Tokıo Olımpıada oıyndarynyń uıymdastyrý komıteti jazǵy oıyndar pandemııaǵa baılanysty sheteldik kórermensiz ótetinin resmı málimdedi. Japonııanyń uıymdastyrý komıtetiniń prezıdenti Seıko Hashımoto baspasóz máslıhatynda álemdegi qazirgi jaǵdaı men eldiń medısınalyq júıesine aýyrtpalyq túsirmes úshin osyndaı sheshim qabyldanǵanyn habarlady.
Komıtet Japonııadan tys satyp alynǵan 600 myńǵa jýyq olımpıada jáne 30 myń paralımpıada bıletterin qaıtaryp beredi. Al kópten kútken oıyndy stadıonda tamashalaı almaıtyn kórermen úshin esten ketpes qaralymdy onlaın uıymdastyrýǵa qoldan kelgenniń barlyǵy jasalatyny aıtyldy.
Japonııada tirkelgen indet juqtyrǵan naýqastardyń sany ózge eldermen salystyrǵanda áldeqaıda az bolǵanymen, kóp adam Olımpıada men Paralımpıada oıyndary kezinde uıymdastyrýshylar vırýstyń taralýyna jol bermeıdi degenge kúmánmen qaraıdy. Álemniń 15 myńǵa jýyq sportshysy qatysatyn sharanyń qaýpi joǵary. Sonymen qatar jarystar ótetin stadıondardyń tek 50 paıyzyn toltyrý kózdelip otyr. Sáýirde oıyndy kórýge múmkindik alatyn sheneýnikter, reporterler men sportshylarǵa kómektesetin qyzmetkerler sany anyqtalatyn bolady.