QR Premer-Mınıstri Asqar Mamınniń tóraǵalyǵymen QR Parlamenti Májilisiniń Tóraǵasy Nurlan Nyǵmatýlınniń qatysýymen Jańǵyrtý jónindegi ulttyq komıssııanyń otyrysy ótti, dep habarlaıdy Egemen.kz
QR Tuńǵysh Prezıdenti – Elbasy Nursultan Nazarbaevtyń Bes ınstıtýsıonaldyq reformasyn iske asyrý jónindegi «100 naqty qadam» Ult josparynyń jáne Memleket basshysy Qasym-Jomart Toqaevtyń 2020 jylǵy 1 qyrkúıektegi Qazaqstan halqyna Joldaýynyń oryndalý barysy qaraldy.
Atqarylyp jatqan jumystar týraly ulttyq ekonomıka mınıstri Áset Erǵalıev, aýyl sharýashylyǵy mınıstri Saparhan Omarov, qarjy mınıstri Erulan Jamaýbaev, energetıka mınıstri Nurlan Noǵaev, ındýstrııa jáne ınfraqurylymdyq damý mınıstri Beıbit Atamqulov, eńbek jáne halyqty áleýmettik qorǵaý mınıstri Serik Shápkenov, densaýlyq saqtaý mınıstri Alekseı Soı, ekologııa, geologııa jáne tabıǵı resýrstar mınıstri Maǵzum Myrzaǵalıev, mádenıet jáne sport vıse-mınıstri Ǵabıdolla Ábdirahymov jáne basqa da jaýapty tulǵalar baıandady.
Búgingi tańda Ult josparynyń 100 qadamynyń ishinde 72 qadam iske asyryldy: «Kásibı memlekettik apparat qurý» baǵyty boıynsha – 15 qadamnyń 13-i, «Zańnyń ústemdigin qamtamasyz etý» baǵyty boıynsha – barlyq 19 qadam, «Indýstrııalandyrý jáne ekonomıkalyq ósim» baǵyty boıynsha – 50 qadamnyń 27-si, «Birtektilik jáne birlik» baǵyty boıynsha – 6 qadamnyń 3-ýi, «Esep beretin memleketti qalyptastyrý» baǵyty boıynsha – barlyq 10 qadam.
Bıyl «Kásibı memlekettik apparat qurý» jáne «Indýstrııalandyrý jáne ekonomıkalyq ósý» baǵyttary boıynsha 9 qadamdy oryndaý josparlanýda.
Otyrysta bıýdjetten tys qorlardyń qyzmetin qamtıtyn «keńeıtilgen bıýdjetti» engizý, zeınetaqy men járdemaqyny taǵaıyndaý jáne tóleý prosesterin sıfrlandyrý, otandyq farmasevtıkany damytý, Áleýmettik Kodekstiń tujyrymdamasyn jáne Qazaqstannyń 2050 jylǵa deıingi tómen kómirtekti damý tujyrymdamasyn ázirleý máseleleri qaraldy.
Premer-Mınıstr Ult josparyn jáne QR Prezıdenti Qasym-Jomart Toqaevtyń 2020 jylǵy 1 qyrkúıektegi Joldaýyn iske asyrý jónindegi Jalpyulttyq sharalar josparyn tolyq jáne sapaly oryndaý boıynsha belsendi jumysty jalǵastyrýdy tapsyrdy.
Strategııalyq ınvestorlardy, birinshi kezekte, jańa jumys oryndaryn qurýdy qamtamasyz etetin ekonomıkanyń basym sektorlaryndaǵy jańa iri jobalarǵa tartý jónindegi tarmaqtarǵa erekshe nazar aýdaryldy.