Shymkentte áz-Naýryz meıramyna arnalǵan dýmandy merekelik sharalardyń kerýenine «Shymkent-Sırk» ujymy da óz úlesterin qosty.
Ataýly kúnge oraı ulttyq naqyshta kıingen sırk ártisteri shahar turǵyndaryna «Naýryz-dýman» merekelik qoıylymyn usyndy.
Akrobattardyń shymyrlyǵy, gımnasshylardyń eptiligi, ártisterdiń, shoý-balet tobynyń jonglerlik ónerdi sınhrondy túrde ıgergendigi baǵdarlamanyń organıkalyq tutastyǵyn, merekelik yrǵaǵyn jandandyra tústi.
Sondaı-aq, Qajymuqan Muńaıtpasulynyń 150 jyldyǵyna arnalǵan «Kúsh atasyn tanymas» qoıylymy kórermen kóńilinen erekshe oryn aldy.
Ásirese, kóktemniń belgisi retinde aınalanyń gúl men ósimdikke kómkerilip turýy kishkentaı kórermenderge kóterińki kóńil kúı syılady. Baǵdarlama aı men kúnniń teńesken sátin eki gımnast áýege kóterilip, tabıǵattyń oıanǵan sátinen bastaý alady.
«4 LED-ekrannan kórsetiletin Naýryz merekesiniń tańdaýly sátteri, ásem kórinisteri mýzyka únimen kórermen qııalyn asqaqtata túsedi. «Naýryz-dýman» merekelik baǵdarlamasyna bir aı kóleminde daıyndaldyq. Ulystyń uly kúnine arnalǵan merekelik qoıylym 2 bólimnen turady. Kúndizgi bólimi 5-10 jas aralyǵynda, al keshki eresek jastarǵa arnalǵan», deıdi «Shymkent-Sırk» mekemesiniń basshysy Nurlan Ydyrysuly.
Búginde elimizdegi úsh úlken sırktiń birine aınalǵan bul óner ujymy megapolıs turǵyndaryn tańǵajaıyp qoıylymdarymen tańǵaldyrýdan jańylǵan emes.
Osy retki merekelik qoıylymdar 28 naýryzǵa deıin jalǵaspaq. Naqtyraq aıtar bolsaq, 19, 20, 27, 28 kúnderi kórermenge qyzyqty qoıylymdar usynylady. 21, 22, 23, 24 naýryz kúnderi sırk manejinde «Habar» telearnasymen birlesip, tikeleı efırde óner juldyzdarynyń qatysýymen Qajymuqan Muńaıtpasulynyń 150 jyldyǵyna arnalǵan «О́ner barysy» uıymdastyrylady.
ShYMKENT