Búgin Almaty qalasyndaǵy №36 Qalalyq emhanasynyń bas dárigeri Gúljaınat Tilegen KVI-men aýyryp shyqqandardyń jaı-kúıleri men aýrýdan keıingi ońaltý máseleleri týraly baıandady, dep habarlaıdy Egemen.kz.
Dárigerdiń aıtýynsha, koronavırýstiń sımptomsyz túrimen aýyryp shyqqandar arnaıy emdeý men ońaltýdan ótýdi qajet etpeıdi. Emdelý pnevmonııamen aýyrǵandarǵa qajet, sebebi, ol kezde ókpe jáne qalǵan dene músheleriniń gıpoksııasy týyndaıdy. Sondyqtan, ortasha jáne aýyr túrde koronavırýspen aýyrǵandar aýrýhanadan salaýatty bolyp shyqpaıdy.
Koronavırýstan sońǵy jaǵymsyz sezim jáne asqynýlar «Kovıdten keıingi sındrom» dep atalady. Kovıdten keıingi sındrom uzaq ýaqyt saqtalýy múmkin, kóptegen apta boıy tipti aı boıy sozylady. Kovıdten keıingi sımptomdar: ókpe fıbrozy, júrek-qantamyr aýrýynyńy asqynýy, kóp uıyqtaý, únemi álsizdikke ushyraý, jadynyń nasharlaýy, kognıtıvti aýytqýlar (durys yqylas aýdarmaý), demikpe, depressııa jáne taǵy basqa da belgiler bolady.
Aǵzany qalpyna keltirý úshin aýyrǵan adamdarǵa ońaltýdan ótý qajet. Bul ókpe men tynys alý fýnksııalarynyń tolyqqandy jumys isteýin qalpyna keltirip, pnevmofıbrıozdy boldyrmaıdy, qalǵan saldaryn joıyp ımýnıtetti kúsheıtedi.
Ol úshin turǵylyqty meken-jaıy boıynsha emhanaǵa, ýchaskelik dárigerge barý kerek, ol óz kezegimen adamnyń jaı-kúıiniń aýyrtpalyǵyn baǵalaıdy. Pasıenttiń kórsetkishteri boıynsha ońaltý ortalyǵyna nemese emhanalyq jaǵdaı boıynsha ońaltýǵa jiberedi.
«Ońaltý - ýqalaý, tynys alý jattyǵýy, emdik dene shynyqtyrý, trenajerlarda jattyǵý jasaý, fızıoterapııa, dári-dármekpen emdeý, fıtoterapııadan turady. Ońaltýdyń bir kýrsynyń uzaqtylyǵy 10-14 kúnge sozylady. Pasıentte ottektiń jetispeýi sebebi: úreı, toryǵý, kúızelis sekildi sımptomdar týyndaıdy. Mundaı jaǵdaıda psıhoterapevke qaralady», deıdi maman.
Sóziniń sońynda Gúljaınat Tilegen KVI-men aýryp shyqqandarǵa aýa almastyrýdyń da ońaltýǵa jatatynyn eskere otyryp, jıi serýendeý, taza aýa jutý, velosıped tebýge keńes berdi.