Búgin DSM mınıstri A.Soı bastaǵan delegasııa Almaty qalasyndaǵy qalalyq №7 klınıkalyq aýrýhanasyna keldi, dep habarlaıdy Egemen.kz.
Mınıstrdiń bul sapary qala basshylyǵymen epıdemııalyq jaǵdaıdy talqylap, medısınalyq mekemelerde Covid-19-ben kúres jumystarymen tanysýdy kózdeıdi.
Mınıstrlik delegasııasymen birge №7 aýrýhanaǵa Almaty qalasy ákiminiń orynbasary Erjan Babaqumarov, Almaty qalasynyń Bas sanıtarlyq dárigeri Jandarbek Bekshın, Almaty qalalyq Qoǵamdyq densaýlyq saqtaý basqarmasynyń jetekshisi Narıman Tabynbaev keldi.
Almatyǵa jumys sapary kezinde Densaýlyq saqtaý mınıstri A.Soıǵa karantın jaǵdaıyndaǵy stasıonar jumystary, aýrýhananyń indet báseńsigen jaǵdaıda nemese epıdahýal kúrt nasharlaǵan jaǵdaıdaǵy josparymen tanystyrdy. Sonymen qatar mınıstrge birneshe bólimsheler, bólmelerdi aýmaqqa bólý, medısınalyq gazben qamtamasyz etý júıesi, aýrýhana men emhana kireberisinde ornatylǵan dene qyzýyn ólsheý teplovızorlary, KVI taralmaýyna yqpal etetin medısınalyq qaldyqtardy tez joıatyn keshen kórsetildi.
Almaty qalalyq №7 klınıkalyq aýrýhanasynyń bas dárigeri Manas Ramazanov aýrýhananyń qala stasıonarlarynyń emdeý algorıtmine sáıkes tolyq daıyn ekendigin málámdedi.