Aqmola oblysynyń Qorǵaljyn aýdany aýmaǵynda ashtan qyrylǵan 14 kıiktiń óleksesi tabyldy, dep habarlaıdy Egemen.kz QazAqparatqa silteme jasap.
Aqmola oblysy boıynsha orman sharýashylyǵy jáne janýarlar álemi aýmaqtyq ınspeksııasynyń basshysy Lashyntaı Dúısenovtyń aıtýynsha, kıikterdiń óleksesin 9 naýryzda Saýmal kólinen 10 shaqyrym aýmaqtan anyqtaǵan. Bul jaǵdaı Qorǵaljyn aýdandyq Polısııa bóliminde №211160030000107 málimetter tizilimi kitabynda tirkeldi. «Kıikterdiń qalyń qar men kúrdeli aýa raıynyń saldarynan shóp teýip jeı almaǵandyqtan ashtan qyrylǵany anyqtaldy», deıdi Lashyntaı Dúısenov. Sondyqtan osy jaǵdaıǵa baılanysty jáne kıikterdiń jappaı qyrylýyn boldyrmaý úshin Aqmola oblysynyń mamandandyrylǵan tabıǵat qorǵaý prokýratýrasy oblystyq orman sharýashylyǵy jáne janýarlar álemi aýmaqtyq ınspeksııasyna Qorǵaljyn, Egindikól, Jaqsy jáne Atbasar aýdandarynyń ákimderine kıikter júretin aýmaqtardaǵy qardy kúreýdi uıymdastyrý týraly nusqaý berildi.
Eske sala keteıik, birneshe kún buryn jabaıy kıikter Aqmola oblysynyń Qorǵaljyn aýlyna kirip ketken bolatyn. Turǵyndar olarǵa jem-shóp bergen edi.