Áz-Naýryz merekesinde Qostanaı oblysynda «Qaıyrymdy ister marafony» jalpyulttyq jobasy aıasyndaǵy jumystardyń aýqymy keńeıe tústi. Aıdyń basynda bastaý alǵan qaıyrymdylyq sharalary óńirdiń barlyq aýdan-qalalarynda ótip jatyr.
Jergilikti qoǵamdyq uıymdar men mekemeler, ónerkásip oryndary men sharýashylyqtar, eriktiler, jeke kásipkerler jumyla kirisken izgilik jobasy barysynda qarttar men kóp balaly analarǵa qoldaý-qurmet, múmkindigi shekteýliler men jetimderge qamqorlyq kórsetilip, eldi mekenderdiń mańyndaǵy tabıǵı sý kózderi qar men qoqystan tazartylýda.
Igi sharany alǵash bolyp mádenı uıymdar men óner ujymdary bastady. Kórisý kúni qarsańynda oblystyq fılarmonııa ártisteri dárigerler men polısııa qyzmetkerlerine, eriktilerge arnap alǵys konsertin ótkizdi. Odan keıin oblystyq isker áıelder qaýymdastyǵy aýyr dertke shaldyqqan Iаsmın Qabenovanyń emine qarjylaı kómek kórsetý maqsatynda «Jan jylýy» atty qaıyrymdylyq konsert uıymdastyrdy. Zarechnyı aýylynda turatyn Iаsmın mıkrotııa jáne atrezııamen aýyrady. 3 jasar sábıdiń byltyr bir qulaǵyna ota jasalǵan, endi ekinshi qulaǵyn emdetýge 6 mıllıon teńgege jýyq qarjy kerek. Atalmysh shara barysynda óńirge belgili kásipkerler, depýtattar, memlekettik qyzmetshiler men qoǵam belsendileri sahnaǵa shyǵyp, án aıtyp, kúı tartty. Konsertte óner kórsetkender de, tamashalaǵandar da bılet satyp aldy. Qaıyrymdylyq bıletteriniń baǵasy 1000 teńgeden bastalyp, 50 myń teńgege deıin bardy. «Teńiz tamshydan quralady degendeı, barlyq konsertten 2 mln teńge túsken. Bul qarjy sábıdiń anasynyń esepshotyna aýdaryldy.
Janashyrlyq sharalarynan jekelegen kásipkerler de qalys qalyp jatqan joq. Máselen, jergilikti kólik kompanııasynyń basshysy kóp balaly ana – Maıra Esimjanovanyń banktik nesıesin jaýyp berdi. Jomart júrek kásipker aty-jónimdi atap kórsetpeı-aq qoıyńyz dep ótindi.
– Bes balam bar. Bári mektep jasynda. Joldasym – kólik júrgizýshi. Memleket qamqorlyǵynan kende qalyp jatqanymyz joq. 14 naýryz kúni joldasym bastyǵyna kirip: «Merekeńizben! Bir jasyńyz qutty bolsyn!», – depti. Oryssha oqyǵan kisi edi, túsinbeı qalypty. Merekeniń mánisin suraǵan eken, kúıeýim tápishtep túsindirip beripti. Bastyǵynyń razy bolǵany sonshalyq, ekeýi qushaqtasyp kórisip, taban astynda ne kómek kerek dep suraǵan eken, bizdiń úıdegi kisi «Bári bar, rahmet!» dep bas tartypty. Nómirimdi kimnen alǵanyn bilmeımin, artynsha maǵan telefon shalyp tur. 2 jyl buryn úıdi jóndep alý úshin, nesıe alyp edik, sony aıttym. 1 mln teńgeden asar-aspas qalypty». – «Eshteme oılamańyz, esh ýaıymdamańyz» dedi de, qaryzymyzdy sol kúni jaýyp berdi, – dedi kóp balaly ana.
Al Rýdnyı meshiti turmysy tómen otbasylarǵa áleýmettik kómek kórsetti. Úı-úıdi aralap, Ulystyń uly kúnimen quttyqtaǵan dinı qyzmetkerler 10 otbasyǵa azyq-túlik sebetterin taratty.
– Basty maqsat qaıyrymdylyqqa ǵana tirelip turǵan joq, tól merekemiz Áz-Naýryz qarsańynda turǵyndardy quttyqtaı baryp, biz otbasylyq tárbıege qatysty áńgime qozǵadyq. Ul-qyzdyń tárbıesinde otbasynyń jylýy mańyzdy oryn alady. Qazirgi qoǵamǵa meıirimdilik, janashyrlyq, baýyrmaldyq degen nárseler asa qajet-aq. Bul – óte mańyzdy qundylyq, – dedi qalalyq meshittiń bas ımamy Bektursyn qajy Ýálıev.
Naýryz merekesi qarsańynda qorshaǵan ortaǵa janashyrlyq bildirýshiler de túrli sharalardy qolǵa aldy. Máselen, Lısakov qalasy mańynda jer astynan aǵyp jatqan tabıǵı aýyz sý kózi bar. Shaǵyn qaladaǵy jastar resýrstyq ortalyǵynyń eriktileri «Taza bulaq» aksııasyn uıymdastyryp, bulaq kózin ashý, aınalasyn tazartý jumystaryn júrgizdi. Belsendiler qoldaryna kúrek alyp, bulaq aınalasyn qalyń qardan tazalady. «Bul bastama el Táýelsizdiginiń 30 jyldyǵy aıasynda Ulystyń uly kúnine oraı uıymdastyrylyp otyr», deıdi eriktiler.
Saýapty isten Qostanaı oblysy ákimdiginiń Tabıǵı resýrstar jáne tabıǵat paıdalanýdy retteý basqarmasy da shet qalmady. Mekeme Tobyl ózeniniń arnasyn tazartyp, jaǵalaýlardy tazartty.
– Biz bul sharaǵa volonterlardy da tartyp otyrmyz. Ondaǵy maqsatymyz – jas urpaqty týǵan jer tabıǵatyn aıalap, tabıǵat baılyǵyn, bulaq kózderin qorǵaı bilýge, eljandylyqqa tárbıeleý. Biz bul sharany jylda Naýryz kelgende qolǵa alamyz. Tobyl jaǵalaýyndaǵy qamys pen butalardy shaýyp, ózenniń túbin tereńdettik. О́zen arnasy keńeıse, sýdyń mol jınalýyna septigin tıgizedi. Sý aǵyny ulǵaıady. Bul óte mańyzdy shara, – dedi basqarma basshysynyń orynbasary Amankeldi Ismaılov.
Naýryz merekesine tusynda oblystyq assambleıadaǵy etno-mádenı birlestikterdiń de kóptegen ıgi isterge muryndyq bolyp, qaıyrymdylyq sharalaryn júzege asyryp jatqanyn aıta ketken jón. Máselen, ulttyq ortalyqtardyń ókilderi qosaǵynan qoldaý tappaı, taǵdyry tyǵyryqqa tirelgen jalǵyz basty jas analar panalaıtyn «Analar úıine» bardy. Jas bosanǵan áıelder 1 jarym jyl boıy osy úıde turyp, ómirge beıimdeledi. Assambleıa músheleri úıdiń aýlasyndaǵy qardy tazalap, munda turyp jatqan analar men sábılerge tátti taǵamdar men jórgek-jaıalyqtar, naýryz-bazarlyqtar tartý etti.
Qostanaı oblysy