Elorda turǵyndaryn koronavırýstyq ınfeksııaǵa qarsy vaksınasııalaý jalǵasýda. Búginde birinshi komponent boıynsha 11 myńǵa jýyq adam vaksınasııadan ótti. Bul týraly Qoǵamdyq densaýlyq saqtaý basqarmasynyń basshysy Tımýr Muratov málim etti, dep habarlaıdy qala ákimdiginiń resmı saıty.
«Ekinshi komponent úsh myńnan astam adamǵa salyndy. Onyń ishinde medısınalyq qyzmetkerler — 5 000-ǵa jýyq, muǵalimder – 2 000-ǵa jýyq, sozylmaly aýrýlary bar adamdar – 1 000-nan astam, quqyq qorǵaý organdarynyń qyzmetkerleri – 1 200-den astam, basqa toptaǵylar – 2 000-ǵa jýyq. Ekpe alǵannan keıin densaýlyqtyń qatty asqyný jaǵdaılary bolǵan joq», dedi vedomstvo basshysy.
Onyń aıtýynsha 36 alǵashqy medısınalyq-sanıtarlyq kómek kórsetý uıymdarynda birinshi jáne ekinshi komponentterge arnalǵan 2 vaksınasııa bólmeleri, vaksınasııadan keıin pasıentterdi baqylaýǵa arnalǵan kútý bólmeleri turaqty rejımde jumys isteıdi.
«Barlyq emhanalarda tońazytqysh qondyrǵylary, vaksınalardy qoımadan ekpe salý mekenine tasymaldaýǵa arnalǵan termııalyq konteınerler bar. Vaksınalar barlyq sanıtarııalyq-epıdemıologııalyq talaptarǵa saı saqtalady», dedi Tımýr Muratov.
Aıta keteıik, qala turǵyndaryn vaksınasııalaý sáýir aıynyń ortasynan bastalady. Vaksınasııa eń aldymen ujymdyq ımmýnıtetke jetý úshin qajet. Bul ınfeksııamen kúreste jaqsy nátıjege jetýge áser etedi.