Kún raıy kúrt jylynsa, Shyǵys Qazaqstan oblysynda 94 eldi mekendi sý basý qaýpi bar. Tilsiz jaýdyń aldyn alý úshin jer-jerde qutqarýshylar tehnıkalaryn saılap, daıyn otyr. Olardan bólek, Jas Otan volonterleri de qolǵa kúrek alyp, áleýmettik áljýaz toptaǵy otbasylarǵa kómek kórsetip júr.
Naýryz aıy bastala sala volonterler qarǵa kómilgen aýlalar men bulaq arnalaryn qardan tazartýǵa kirisken. Kóbesi sógilmegen kúrtik qardy oıyp alý da ońaı emes. Sonyń ózinde shyn janashyrlyq tanytqan jastar qaýiptiń aldyn alý úshin aıanyp qalyp jatqan joq.
Glýbokoe aýdanyndaǵy Jas Otan volonterleri TJD mamandarymen birlesip, respýblıkalyq «30 ıgi is» aksııasy sheńberinde jalǵyzbasty, múmkindigi shekteýli jandardyń aýlalaryn qardan aryltýǵa atsalysyp júr. Sonymen qatar qyzyl sý júrýi yqtımal aryqtardy da tazalap shyqty.
– Qaı kezde bolsyn, kómekke muqtaj jandardyń janynan tabylamyz. Qystaı qarııalardyń, jalǵyzbasty analardyń úıindegi sharýasyna qolǵabys ettik. Endi mine, qarǵyn sýdyń aldyn alýǵa septigimizdi tıgizsek dep júrmiz, – deıdi Glýbokoe kentiniń turǵyny, volonter Shákárim Maralhanov.
О́zen boıynda jatqan Glýbokoe, Altaı, Borodýlıha syndy aýdandardyń keıbir aýyldaryna sý basý qaýpi tónip tur. Sondyqtan da turǵyndardyń erte qamdanǵandary jón. Qatarlary tolyǵyp kele jatqan volonter jastar da bir jaǵynan shyǵysyp júr. Ásirese, byltyr indet qysqan kezde kópshilik solardyń kómegine júgingen.
Sonymen qatar tasqynnyń aldyn alý úshin óńir boıynsha 2412 tehnıka, 370 motopompa daıyndalyp, 87 myń dana ydys-qap, 15 myń tonna ınertti materıaldar ázirlengen. Qutqarýshylar halyqqa túsindirý jumystaryn júrgizip, barynsha abaı bolý qajettigin eskertip-aq jatyr.
Shyǵys Qazaqstan oblysy