Álemdegi sý kózderiniń lastanýy – ózekti másele. Osynyń aldyn alý úshin Semeıdegi fızıka-matematıka baǵytyndaǵy Nazarbaev zııatkerlik mektebiniń oqýshylary tyń joba oılap tapty. Olar qaıta óńdelgen plastıkalyq bótelkelerden tabıǵı sý qoımalaryn qoqystan tazalaýǵa arnalǵan robot maketin qurastyrdy.
– Sýdyń lastanýy týraly aqparattardy oqyǵanymda óz kózime ózim sene almadym. Osynyń barlyǵy adamnyń qolymen jasalatyny ókinishti. Sonyń aldyn alý maqsatynda joba jasap, saıysta jeńiske jettim. Oǵan kópshiliktiń nazary aýdy. Sóıtip maket jasadym, – deıdi ónertapqysh oqýshy Arýjan Qaımoldına.
Oǵan kómektesken Nurbol Maqtaev «WRO-2020» dúnıejúzilik LEGO robottar olımpıadasynyń júldegeri, qultemir jasaýdyń sheberi. Oqýshylardyń endigi oıy – sýdyń betindegi, túbindegi qoqysty jınaýǵa jáne sý qoımasynyń ekologııalyq jaǵdaıyn baqylaýǵa arnalǵan robottandyrylǵan keshen qurý. Shaǵyn makettegi robottandyrylǵan keshenniń ózi eki bólikke bólindi: aeroqaıyq jáne jyljymaly qalqymaly mehanızm. Aeroqaıyq robotty keshendi sý qoımasy arqyly berilgen baǵyt boıynsha jyljytý fýnksııasyn oryndaıdy. Jyljymaly qalqymaly mehanızm sý astyndaǵy jáne ústinde qoqys jınaýǵa jumyldyrylady.
– Bizdiń robottandyrylǵan keshen sý astyndaǵy jáne ústindegi qoqystardy jınap, beınekameralar kómegimen sý asty áleminiń jaǵdaıyn, onyń faýnasy men florasyn baqylaıdy, – deıdi joba avtorlarynyń biri Nurbol Maqtaev.
Jas zertteýshilerdiń endigi jospary toksınder men zııandy hımııalyq qosylystardan tiri aǵzalarǵa zııan tıgizbeıtin nemese áser etpeıtin sýdy tazartatyn hımııalyq zattarǵa IGW qosý. Sonymen qatar jobany jetildirip, «Daryn» saıysynda baqtaryn synamaq. Bári sátimen júzege asyp jatsa, jobany patenttep qoıý kerek desedi.
SEMEI