Bıyl 29 naýryzda Memleket basshysy Qasym-Jomart Toqaev 1-surypty undy bırjalyq taýarlar tiziminen alyp tastaý týraly sheshim shyǵardy. Prezıdenttiń resmı saıty bul týraly «Memleket basshysy un naryǵynyń ereksheligin jáne onyń eksporttyq áleýetin eskere otyryp, undy bırjalyq taýarlardyń tizimine qosýǵa erte dep sheshti» dep jazdy. Jyl bastalǵaly otandyq dıirmenderdiń bas aýrýyna aınalǵan kókeıkesti máseleniń der kezinde oń sheshim tabýy un óndirýshi kásipkerlerdi qýantyp otyr.
Bul jaıynda «Brendti undy bırjada satýǵa qarsy» degen taqyryppen «Egemen Qazaqstan» gazetiniń bıyl 9 aqpandaǵy sanynda jarııalanǵan maqalada jan-jaqty másele qozǵalǵan edi. Esterińizde bolsa, Saýda jáne ıntegrasııa mınıstrligi byltyr 2021 jyldyń shilde aıynan bastap 1-surypty undy bırjalyq taýarlardyń sanatyna engizý týraly uıǵarymǵa kelgen. Artynsha mınıstrliktiń bul sheshimine shetelge un eksporttap otyrǵan iri dıirmender narazylyq bildirdi. О́ıtkeni qazaq unynyń birden-bir basty ımporteri – Aýǵanstan tarapy bırja saýdasyna tehnıkalyq turǵydan daıyn emes. Al un bırja arqyly saýdalana bastasa, Qazaqstan eksporttaǵy qomaqty úlesinen aıyrylyp qalýy múmkin.
Memleket basshysynyń sheshimine, ásirese bıyl syrtqa saýdalanatyn un kólemin ulǵaıtýdy kózdep otyrǵan Qostanaı oblysynyń un óndirýshi kásipkerleri qatty qýandy.
– Bul – bizdiń óńirdegi ǵana emes, jalpy búkil elimizdegi dúıim dıirmen kásiporyndary taǵatsyzdana kútken súıinshi jańalyq. Buǵan deıin bul máseleni biz oblystyq kásipkerler palatasynda birneshe ret kóterip, unnyń bırja arqyly satylýy salany toqyraýǵa ákeletinin aıtqan bolatynbyz. Naqtyraq aıtsaq, un bırja arqyly satyla bastasa, otandyq un eksporty úlesiniń 65 paıyzyn alyp otyrǵan Aýǵanstanǵa shyǵatyn jol jabylady. О́ıtkeni bul elde bizdegideı emes, jaǵdaı turaqsyz, olar bırjalyq saýda qatynastaryna daıyn emes. Sonymen qatar birinshi surypty un qazaqstandyq brend bolyp sanalady. Iаǵnı ár kásiporynnyń kóp jyldan beri qalyptasyp qalǵan senimdi klıentteri bar. Taǵy bir másele, bırjalyq saýda talaptary boıynsha undy saqtaý merzimi óte qysqa. Bul – kásipkerler úshin qolaısyz. Kásipkerler palatasynyń saraptama qorytyndysynda osynyń bárin tizip kórsettik. Memleket basshysy jaǵdaıdy durys baǵamdap, máseleni kásipkerlerdiń paıdasyna sheship berip otyr. Bul – biz úshin úlken qýanysh, – dedi Qostanaı oblysy kásipkerler palatasynyń dırektory Murat Ábenov.
Qostanaı oblysy