Almatydaǵy Memlekettik Ortalyq mýzeıinde ashylǵan «Masatydaı qulpyrǵan...» kórmesinde kilem jáne toqyma buıymdarynyń sanalýan túrleri kelýshiler nazaryna usynyldy.
Elimizdiń ońtústik, soltústik jáne batys óńirleriniń dástúrine saı toqylǵan, kórkemdik-tarıhı mańyzy joǵary qazaq kilemderi osy kórmeniń árin ashyp, árbir jádigerdiń tarıhı mańyzyn aıshyqtaı tústi. Qalpyna keltirilgen kilem jáne toqyma buıymdarynyń mýzeı qorynda uzaq jyldar boıy saqtalýynyń ózindik syry bar. Ulttyq jádigerlerge jańa tynys berip, kórkemdigin qalpyna keltirgen mýzeı restavratorlarynyń kásibı sheberligi otyz bes jyldyq tarıhy bar Qalpyna keltirý bóliminiń tarıhymen sabaqtasyp jatyr. Uzaq ýaqyt osy salada eńbek etken tájirıbeli mamandardyń tarıhı-mádenı eskertkishterdi jańǵyrtý, qalpyna keltirýdiń qyr-syryn, tásilderin ıgerýdegi eńbegi orasan.
Mýzeıdiń qoǵammen baılanys mamandarynyń derekteri boıynsha, tarıhı-mádenı artefaktilerdi qalpyna keltirý jumystary tarıhı, mádenı, mýzeılik mańyzy bar buıymdardy búlinýden saqtap, uzaq ýaqyt saqtaýǵa múmkindik beredi. Búginde mýzeı qorynda saqtalyp kelgen jádigerlerdiń ómirsheńdigi qalpyna keltirý jumystarynyń sapasymen baılanysty. Qazirgi kezde mýzeıde keskindeme, grafıka, qysh, mata buıymdary, kilem-kıiz, taǵy da basqa qundylyqtardy restavrasııalaýmen aınalysatyn 8 biliktiligi joǵary sýretshi-qalpyna keltirýshi jumys isteıdi.
Kilemder kórmesiniń maqsaty – mýzeı qory negizinde qazaq halqynyń kilem jáne toqyma buıymdarynyń tirshilik qamyndaǵy qoldanysyn, materıaldar men toqylý tehnıkasyn, sharýashylyq, turmystyq jáne de dástúrli kilem toqý mádenıetiniń alýan túrliligin kórsetý. Sonymen birge kórmede qazaq kıiz úı jabdyqtaryn tamashalaýǵa bolady.
ALMATY