Batys Qazaqstan oblystyq órt sóndirý bóliminiń bastyǵy aıaýsyz soqqyǵa jyǵyldy, dep habarlaıdy Egemen.kz Uralskweek.kz saıtyna silteme jasap.
Oqıǵa Batys Qazaqstan oblysy, Aqjaıyq aýdany, Qaraýyltóbe aýylynda 25 naýryzda boldy. №27 órt sóndirý beketiniń bastyǵy Aqan Nurǵalıev aýyr soqqylardyń nátıjesinde qaıtys boldy. Marqumnyń aǵasy Rýslan Nurǵalıevtiń aıtýynsha, bólim basshysyn áriptesteri túngi saǵat 23:00 shamasynda jumysqa shaqyrǵan. Sebebi habarlaýshyǵa belgisiz.
«О́rt sóndirý beketinde eki órt sóndirýshiden basqa taǵy eki syrttan kelgen adam bolǵan. Barlyǵynyń mas kúıde bolǵany anyqtaldy. Men qandaı janjal shyqqanyn, kim kimdi urǵanyn bilmeımin, biraq meniń aǵam qatty soqqyǵa jyǵylǵan. О́rt sóndirý bóliminde dáleldemelerdi jasyrý úshin kameralar buzyldy. Kelesi kúni aǵam baýyrymyzdyń qorasynan tabyldy, olardyń úıi aýyldyń shetinde ornalasqan. Tańerteń jeńgem qorada bireýdiń jatqanyn kórip, aǵamdy tanyǵan. Bul týraly bizge birden habar berip, jedel járdem shaqyryldy. Ol dereý oblystyq aýrýhananyń jansaqtaý bólimine jetkizildi. Al 27 naýryzda tańǵy saǵat 5-te qaıtys boldy. Artynan úsh balasy jetim qaldy», dedi Rýslan Nurǵalıev.
Batys Qazaqstan oblystyq Polısııa departamentiniń baspasóz qyzmeti atalǵan fakt boıynsha sotqa deıingi tergeý amaldary júrgizilip jatqanyn habarlady.