Basketboldan taıaýda ǵana aıaqtalǵan Joǵary lıga komandalary arasyndaǵy Qazaqstannyń XXIX chempıonatynda Qaraǵandy oblysynyń «Qaraǵandy» klýby júldeli úshinshi oryndy jeńip aldy. Mundaı deńgeıdegi dodaǵa tuńǵysh ret túsip otyrǵan ujym úshin bul – úlken jetistik.
Taıaýda atalǵan kásibı klýbty ózi quryp, qazirgi ýaqytta onyń basshysy bolyp qyzmet etetin Dastan Aıapbekke jolyǵyp, ózimizdi qyzyqtyrǵan birneshe suraqqa jaýap alǵan edik.
– Dastan Erikuly, jaqynda ǵana aıaqtalǵan chempıonat týraly pikirińizdi bilsek. Siz basqaratyn klýbtyń negizgi qarsylastary kimder boldy?
– Chempıonat óte tartysty ótti. Bizge qarsy oınaǵan jeti komandanyń bári de sheberlikterine qurmetpen qaraýǵa turarlyq qarsylas boldy. Týrnırde top jarǵan Qyzyljardyń «Bars», kúmispen kúptelgen Shymkenttiń «Qazyǵurt» komandalarymen bolǵan teketireske toly oıyndardan ózimizge paıdaly kóp dúnıe aldyq.
Shynyn aıtqanda, týrnırge tuńǵysh qatysyp otyrǵandyqtan, oıyndar bizge ońaıǵa soqpady. Tájirıbemizdiń tolyspaǵany da ras edi. Bıýdjetimiz de basqalarǵa qaraǵanda azdaý boldy. Biraq osynyń bárine qaramastan, táýir nátıjege qol jetkizdik dep oılaımyn. Biz úshin bul – tarıhı oqıǵa.
– Komanda quramyna qarap otyrsaq, negizinen ózimizdiń uzyn boıly ulandarymyz oınaıdy eken...
– Bizdiń komandanyń quramy túgelge derlik Qaraǵandy oblysynyń oıynshylarynan turady. Mysaly, klýbta Qaraǵandy, Jezqazǵan, Temirtaý, Balqash, Shahtınsk qalalarynan, Kókpekti aýylynan basketbolshylar óner kórsetedi.
– Komanda quramynda legıoner oıynshy bar ma?
– Qazir bizdiń komandada Nıkolaı Mýha esimdi bir ǵana legıoner oıynshy bar. О́te talantty basketbolshy. Bıylǵy chempıonattyń qorytyndysy boıynsha «Eń úzdik oıynshy» ataǵyna ıe boldy. Tólqujat boıynsha ol – Reseı azamaty. Endi óziniń aıtýynsha, Qazaqstannyń azamattyǵyn alǵysy keledi.
– Bolashaqqa degen josparlaryńyzben bólisseńiz. Alǵa qoıǵan qandaı maqsat bar?
– Bolashaqqa degen josparymyz óte zor. Máselen, basketbol oıynyn damytý isinde mesenattardyń da kómegine júginsek deımiz. Qazirgi ýaqytta bizge Igor Amalatov degen kásipker kómektesip turady. Biz onyń ıeligindegi zalda jeńildikpen jattyǵamyz. Bolashaqta osy zaldyń janyndaǵy eki qabatty ǵımaratty satyp alyp, ony basketbolshylar turatyn zamanaýı úlgidegi jataqhanaǵa aınaldyrsaq degen jobamyz bar. Álbette, munyń bári bıýdjetke baılanysty sheshiletin sharýalar.
Jalpy, bizdiń aldymyzǵa qoıǵan maqsatymyz – eki jyldan keıin Ulttyq lıgaǵa shyǵyp, elimizdiń eń myqty komandalarymen kúsh synasý.
– Komandadaǵy talantty oıynshylardy basqa klýbtar jaqsy jalaqy usynyp, ózderiniń qataryna qosyp almaı ma degen qaýip joq pa?
– Bul taqyrypta talaı áńgime bolǵan. Bir qýanarlyǵy, jigitter ujymdy tastap ketpeımiz dep nyq aıtady. Komandadaǵy bereke-birlik, yntymaq, jalpy ahýal olarǵa unaıtyn bolsa kerek. Jáne olar Qaraǵandy basketbol mektebiniń aldyndaǵy ózderiniń tuńǵyshtar retindegi tarıhı mıssııasyn óte jaqsy túsinedi. Osyndaı azamattyq berik ustanymdary úshin basketbolshy jigitterimizge rızashylyǵymdy bildirgim keledi.
– Komandanyń jattyqtyrýshylar shtaby týraly aıta ketseńiz.
– Komandada bir ǵana jattyqtyrýshy bar, ol mamannyń aty-jóni – Aleksandr Aleksandrovıch Tıýtıýnık. О́z isine berilgen, óte tájirıbeli jáne bilikti maman. Kezinde ol Qazaqstan qurama komandasynyń sapynda óner kórsetken. Jastar arasyndaǵy álem chempıonatyna negizgi oıynshy retinde qatysqan.
– Oblys sportynyń basshylyǵy tarapynan qoldaý qandaı deńgeıde dep oılaısyz?
– Shynyn aıtqanda, komandanyń bolashaǵy bıýdjetine baılanysty ǵoı. Bir qýanyshtysy, jaǵdaıymyz ýaqyt ótken saıyn jaqsaryp keledi. Álbette, oblystaǵy basshylar tarapynan jan-jaqty qoldaý bolmasa, biz mundaı nátıjege qol jetkizbes te edik. Osyndaı qamqor nıet barda bolashaǵymyz jarqyn bolýy tıis degen nyq senimdemiz.
Áńgimelesken
Qaırat ÁBILDA,
«Egemen Qazaqstan»
QARAǴANDY