Májilismender kókeıkesti máselelerdi kóterdi

Atap aıtqanda, depýtattar «Eýra­zııa­lyq ekonomıkalyq odaq­tyń tehnıkalyq reglament­terinde talaptar belgilenbegen ónim­niń Eýrazııalyq ekonomıka­lyq odaq sheńberindegi aınalysy­nyń tártibi jáne mundaı ónimniń qaýipsizdigin qamtamasyz etý qaǵıdalary týraly kelisimdi ratıfıkasııalaý týraly» zań jobasyn ratıfıkasııalady.

«Qujattyń negizgi baǵyttary odaq aýma­ǵynda aınalystaǵy barlyq ónim­der­diń qaýipsizdigin qam­tamasyz etý. Birin­shiden, bul odaq deńgeıinde ónimge qa­tys­­ty mindetti talaptar belgi­le­netin ónim­niń biryńǵaı tiz­besi­ne en­gizilmegen ónim­der. Ekin­shi­den, odaqtyń biryń­ǵaı teh­nı­ka­lyq reglamentteri qabyl­dan­­­baǵan nemese kúshine enbegen ónim­der. О́nimniń biryńǵaı tiz­be­si tu­­ty­­ný jáne paıdalaný ke­zin­de qa­ýip­­­tiligi joǵary táýe­kel­­der­men sı­­pat­talatyn ónim túr­­­lerin qam­­tı­dy. Bul tizbe odaqqa mú­she el­­der­diń jáne halyq­ara­lyq tá­­ji­­rıbeni eskerip otyryp ázirlengen.

Búgingi tańda aınalysqa shy­ǵa­ry­­latyn ónimniń 85 paıyzy Eýra­zııalyq ekonomıkalyq odaqtyń biryńǵaı tehnı­kalyq reg­lamentimen retteledi. Bul ta­maq ónimderinen bastap, balalar ındýstrııasy taýarlary, jeńil ónerkásip, mashına jasaý jáne basqa da ónim túr­leriniń keń taýar nomenklatýrasyna ar­nal­ǵan tehnıkalyq reglamentter. Osy keli­sim odaq naryǵyndaǵy ónim­­­derdiń qal­ǵan 15 paıyzyn ret­­teıdi», dedi zań jo­basy jó­nin­­de baıan­­d­ama jasaǵan Saýda jáne ın­­te­­grasııa mınıstri Baqyt Sultanov.

Mınıstrdiń aıtýynsha, qa­zir­gi tańda taýarlar nomen­kla­tý­­ra­­syna taldaý ja­salǵan. Oǵan, negizinen, áleýetti qaýip tón­­­dir­meıtin ónimder kiredi. Máse­len, zer­­­gerlik buıymdar, saǵat, tur­mystyq shet­­ka, jasandy zerger bu­ıym­dary sekil­­di ónimder bar. B.Sul­tanov qabyl­dan­­­ǵa­ly otyr­ǵan kelisim bıznes úshin ákim­­­­shi­­lik kedergi keltirmeıtinin atap ótti.

«О́nim týraly málimetterdi aqparat­tyq bazada jınaqtaý kózdeledi. Olar tutynýshylar úshin qoljetimdi jáne naryqtaǵy jaǵdaıdy zertteý maqsatynda paıdalanýǵa ashyq bolady. Bul jańa ónim túrlerine den qoıý­ǵa jáne turaqty monıtorıng júr­gizýge múmkindik beredi.

Kelisim iske asyrý maqsa­tyn­da tár­tip­ti retteıtin ónim aınalysy qaǵı­da­­lary­nyń jobasy ázirlendi. Qazir­gi tańda bul qa­ǵı­dat­tardy bıznes-qaýym­­dastyq pen «Atameken» ulttyq kásip­ker­ler palatasy talqylap jatyr», dedi mınıstr. Onyń aıtýynsha, búgin­gi tańda odaqqa múshe úsh memleket kelisimdi ratı­fı­ka­sııa­laý boıynsha memle­keti­shi­lik rásimderdi aıaqtaǵan. Máji­lis de­pýtat­tary zań jobasyn biraýyz­dan maquldap, daýys berdi.

Sondaı-aq depýtattar «Kvazı­mem­leket­tik sektordyń jekelegen sýbek­tileriniń satyp alýy týraly» jáne oǵan ilespe zań jobalaryn ekinshi oqylymda maquldady.

Zań jobalary jóninde Máji­lis­tiń Ekonomıkalyq reforma jáne óńirlik damý komıtetiniń múshesi Abılfas Hamedov baıandama jasady. Depýtat atalǵan qu­jattyń Prezıdent Qasym-Jomart Toqaevtyń 2020 jylǵy 1 qyrkúıektegi  Joldaýyn iske asyrý jónindegi Jalpyulttyq is-sharalar jospary aıasynda ázirlengenin atap ótti.

Jumys toby zań jobasyn tal­qy­laý barysynda depýtattar bir­qatar túze­tý en­gizgen. Atap aıtsaq, zań jo­ba­sy­­nyń nor­­ma­lary qoldanyl­maı­tyn jaǵ­­daı­lar­dyń tolyq tizbesi bel­­­gi­­lenedi. Kvazı­mem­lekettik sek­tor sýbek­­­ti­leri­niń satyp alýyn baqylaý jó­nin­degi orta­lyq­­tandyrylǵan qyzmet­ter­diń ótinish berýshi satyp alý pro­ses­­­terine shaǵym jasaǵan kezde oǵan naq­ty merzimderde negiz­del­gen jaýaptar beril­mek. Buǵan qosa, tapsyrys berý­shi­niń kon­kýrstyq qujattamany bergennen jáne ashqannan keıin áleýetti ónim berý­shi­ler­den qosymsha qujattardy talap etýi­ne tyıym salý jóninde túzetý engizilgen.

A.Hamedov qujatta jetkizý­shilerdiń múddesin qorǵaý úshin oryndalǵan kelisimsharttar bo­ıynsha jetkizý aqysyn tolyq tóleý merzimi 30 jumys kúni bolyp bekitilgenin atap ótti.

Jıyn sońynda Májilis depýtattary memlekettik organdar basshylaryna depýtattyq saýal joldady. Asqar Beı­senbaev Ońtústik Koreıadaǵy qazaq­­stan­dyq eńbek mıgranttary týraly másele kóterdi. Onyń aıtýyn­sha,  qazaqstandyq aza­­mat­tar atalǵan elge zańsyz eńbek etý úshin sońǵy 6 jyl boıy tý­rıs­tik vızany arqaý etip, ja­sy­ryn barady. 2014 jyldan beri zań­syz jumys isteýge barǵan mıgrant­tardyń sany 359 adamnan 2019 jyly 12 myń adamǵa deıin kúrt ósken.  Depýtat Ońtústik Koreıa­ǵa Qyrǵyzstan, Mońǵolııa jáne О́zbek­stan elderinen azamattar kóp baraty­nyn, biraq ol elderdiń azamattary eki­jaqty kelisimsharttyń negizinde, «E-9 ýaqyt­sha» eńbek vızasyn alý ar­qyly zańdy jumys istep júr­genin atap ótti.

Irına Ýnjakova koronavırýs ın­feksııasyna qarsy halyqty vak­sı­nalaýdyń baıaý júrip jat­qanyna alańdaýshylyq bildirdi. Onyń aıtýynsha, Densaýlyq saqtaý mınıstrligi bul naýqandy júıeli uıymdastyra almaı otyr.

«Jurt qaıda baryp vaksına alýǵa bolatynyn bilmeıdi. Sebebi óńirlerdegi emhanalarda vaksına joq. Densaýlyq saqtaý mınıstrligi bıyl aldyn ala is-qımyl algorıtmin jasaı almady ma? Kóptegen adamnyń kókeıinde osyndaı suraq tur», dedi depýtat.

Sondaı-aq Arman Qojah­metov, Vla­dımır Tohtasýnov, Be­­rik Dúısen­bı­nov, Andreı Lın­nık, Aıgúl Juma­baeva, Bekbolat Ti­leý­han, Aıjan Sqaqova, Azat Per­ýashev depýtattyq saýal joldady.