«Altyn jebe» arnaıy operasııalar kúshterin keshendi tekserýdiń ekinshi kezeńi Qazaqstannyń batys óńirinde ótýde. Buǵan Qurlyq áskerleriniń, Áýe qorǵanysy kúshteriniń jáne Áskerı-teńiz kúshteriniń áskerı bólimderi qatysty.
Tekserý Aqtaý men Atyraý garnızondarynyń áskerı bólimderin joǵary jaýyngerlik daıarlyq deńgeıine keltirýden bastaldy. Bólimder ornalasqan jerlerde jeke quramdy jınaý men habarlaý, sonymen qosa qoıylǵan mindetterdi oryndaýǵa daıyndyǵyn tekserdi. Aqtaý garnızonynyń bólimsheleri «Oımasha» polıgonynda jaýyngerlik tapsyrmalardy oryndaý aýmaǵyna marsh jasady. Atyraý garnızonynan bólimsheler jasaqtary polıgonǵa áskerı-kólik avıasııasynyń ushaqtarymen jetkizildi.
- Áskerı qyzmetshiler ınjenerlik daıyndyqty, radıasııalyq, hımııalyq jáne bıologııalyq qorǵanysty, áskerı-medısınalyq daıyndyq pen mına jarý isin úırengen, baılanys pen áskerı topografııany uıymdastyrýdan qajetti mashyqtanǵan, bilim jınaqtaǵan. Jeke quram jaqsy nátıje kórsetýge qabiletti, al komandırler jan-jaqty, durys sheshim qabyldaı alady, – dep atap ótti bólim komandıriniń birinshi orynbasary – shtab bastyǵy maıor Jalǵas Rahymǵalıev.
Basqarý organdarynyń jumysyna, barlaýǵa, artıllerııa atysyn retteýge jáne avıasııany basqarýǵa erekshe kóńil bólinedi. Tapsyrmalardyń ózgesheligi, ony qumdy jerde oryndaýda bolmaq.
Keshendi tekserý barysynda bólimshelerdiń dıversııalyq-barlaý is-qımyldaryn júrgizýi, kúndiz jáne túnde áskerı taktıkalyq atys jattyǵýlaryn oryndaýy baǵalanady. Áskerı qyzmetshiler arnaıy-taktıkalyq, ınjenerlik, áskerı-medısınalyq daıarlyqtan, mına-jarý isinen jeke synaqtar, al baılanys jáne áskerı topografııadan normatıvter tapsyrady.
Buǵan deıin Shyǵys Qazaqstandaǵy áskerı bólimder tekserilgen bolatyn. Jeke quram arnaıy operasııalar kúshteri quramdarynyń júktelgen mindetterge sáıkes jaýyngerlik tapsyrmalardy oryndaýǵa daıarlyǵyn kórsetti.
«Altyn jebe» tekserisiniń ekinshi kezeńi osy jyldyń 10 sáýirine deıin jalǵasady.