Halyqaralyq Túrki akademııasynyń prezıdenti Darhan Qydyráli Qazaqstannyń bastamasymen ótken Túrki keńesiniń kezekten tys beıresmı sammıtine qatysty pikir bildirdi. Bul týraly ol óziniń Facebook paraqshasynda jazdy, dep habarlaıdy Egemen.kz.
«Qazaqstannyń bastamasymen ótken Túrki keńesiniń kezekten tys beıresmı sammıti tarıhı jıyn boldy. Sammıtke Eýropadan Majarstannyń jáne irgedegi jabyq el Túrkimenstannyń qatysýy bas qosýdyń salmaǵyn arttyra tústi. Bul rette jıyn taqyrybynyń Túrkistanǵa arnalýy jáne Qarabaq jeńisinen keıingi alǵashqy keleli keńes bolýy da mańyzdy», dep jazdy D. Qydyráli.
Budan soń, ol sammıtte aıtylǵan oılar men memleket basshylarynyń usynystaryn 4 taqyrypqa bólip jazǵan:1. Ekonomıkalyq yntymaqtastyqty arttyrý, sonyń ishinde kólik-komýnıkasııa salasy men týrızmge mán berý, Azııa men Eýropany jalǵaıtyn «Turan dálizin» tıimdi paıdalaný, Investısııalyq Qor qurý, trans-shegkralyq sýlar máselesin sheshý;2. Saıası yntymaqtastyqty arttyrý, Túrki keńesiniń atyn ózgertip, halyqaralyq uıym retinde ataý, strategııalyq seriktestikke mán berip, bolashaq baılanystarǵa baǵdar bolatyn qujat qabyldaý, yntymaqtastyq uıymdarynyń qurylymdyq qujattaryn aıaqtaý;3. Gýmanıtarlyq-mádenı baılanystardy arttyrý, túrki áleminiń tuǵyrly tulǵalary Nızamıdiń 880, Iýnýs Ámireniń 700, Naýaıdiń 580 jyldyǵy syndy mereıtoılardy birge atap ótý, Túrkistan men Q.A.Iasaýı murasyn dáripteý, mádenıet salasynda Naýaı atyndaǵy halyqaralyq syılyq bekitý;4. Ǵylym-bilim salasynyń pandemııa kezinde mańyzy artqandyǵyn eskere otyryp, ǵylymı ıntegrasııaǵa mán berý, uly tulǵalar men qasterli mekenderdi zerttep, zerdeleý, Túrkistanda arheologııalyq qazba jumystaryn júrgizý, baýyrlas elderdiń joǵary oqý oryndaryn úılestiretin «Uly túrkiler» jobasyn bastaý, Q.A. Iasaýı atyndaǵy ýnıversıtetti túrki áleminiń ortaq oqý ornyna aınaldyryp tamyrlas jurttar óklderine arnap 50 «Iasaýı shákirtaqysyn» belgileý. Sońǵy, ǵylym men bilim salasyndaǵy usynystardyń barlyǵyn Qazaqstan Prezıdenti Qasym-Jomart Toqaev aıtty.
«Bul usynystar, ásirese, «Iasaýı shákirtaqasy» bolashaq ıntegrasııanyń bekem irgetasy bolatyn bastamalar. Sondyqtan túrki álemindegi ǵylymı ıntegrasııany úılestirýge jaýapty uıym retinde akademııa atynan bul usynystarǵa qýanyp qaldyq. Taǵy bir atap aıtarlyq jaıt, Memleket basshysy Q.Toqaev Túrki keńesine alǵash ret qatysyp otyrǵanymen, alqaly jıyndy óte jaqsy júrgizdi. Buǵan deıin Elbasy 1992 jyldan bastap barlyq Sammıtterge qatysqany belgili. Demek Qazaqstannyń túrki álemindegi qarashańyraq retindegi qyzmeti sabaqtastyq arqyly jalǵasyn taba beredi», delingen jazbada.