Osy jyldyń naýryz aıynda Qazaqstan Respýblıkasynyń Prezıdenti Qasym-Jomart Toqaev pen Qyrǵyz Respýblıkasynyń Prezıdenti Sadyr Japarov arasynda saýda-ekonomıkalyq yntymaqtastyqty nyǵaıtý týraly kelisilim jasaldy, dep habarlaıdy Egemen.kz Polisia.kz saıtyna silteme jasap.
Eki eldiń ishki ister organdary shekara mańynda ornalasqan aýdandardaǵy krımınogendik jaǵdaıdy jaqsartý jáne memleketter ekonomıkasyn damytý úshin qolaıly jaǵdaılar jasaý jóninde sharalar qabyldaýda.Búgin ótken kezdesý barysynda Qazaqstan men Qyrǵyzstannyń Ishki ister mınıstrleri Erlan Turǵymbaev pen Ulan Nııazbekov ekijaqty yntymaqtastyq máselelerin talqylap, aýqymdy taqyryptar boıynsha pikir almasty. Kezdesý barysynda eki eldiń polısııa vedomstvolarynyń basshylary transshekaralyq uıymdasqan qylmysqa qarsy kúreste ishki ister organdarynyń birlesken kúsh-jigerin odan ári úılestirý jáne jumysyn jandandyrý, jedel, krımınalıstıkalyq, quqyqtyq aqparat almasý týraly nıetterin bildirdi. Qyrǵyzstannyń IIM basshysy Qazaqstannyń ishki ister organdaryn jańǵyrtý, sonyń ishinde polısııa qyzmetin sıfrlandyrý, qoǵamdyq tártip pen qaýipsizdikti qamtamasyz etý, vedomstvolyq bilim berý reformasy máseleleri boıynsha halyqpen qarym-qatynas jasaý, sondaı-aq azamattardyń polısııaǵa degen senimin arttyrý jáne olarmen tıimdi keri baılanys ornatý máselelerine erekshe qyzyǵýshylyq tanytty.
«Qazirgi zaman talabyna saı Qyrǵyzstanda Qazaqstandaǵy sııaqty sot-quqyq júıesin, onyń ishinde ishki ister organdaryn reformalaý boıynsha jumystar júrgizilýde. Búgingi kezdesý ishki ister organdarynyń qyzmetin reformalaý salasynda oń tájirıbe almasý úshin paıdaly bolatynyna senimdimin. Biz yntymaqtastyqty nyǵaıtýǵa múddelimiz jáne ózara baılanysty kúsheıtýdi usynamyz», dedi Ulan Nııazbekov.
Jedel-izdestirý qyzmeti boıynsha yntymaqtastyq oń nátıjeler berýde. О́tken jáne aǵymdaǵy jyldyń úsh aıynda Qazaqstanda qylmys jasaýǵa qatysy bar 35-ten astam adam anyqtaldy. О́z kezeginde Qyrǵyzstan mılısııa qyzmetkerleri izdeý jarııalanǵan 17 kúdiktini ustady. Mınıstr Erlan Turǵymbaev jýyrda ǵana Almatyda birlesken arnaıy operasııa nátıjesinde avtokólikter arqyly jasalǵan birneshe alaıaqtyqqa qatysy bar UQT músheleriniń biri ustalǵanyn habarlady. Birqatar tergeý amaly júrgizilgennen keıin ol kórshi respýblıkaǵa ekstradısııalanady.Shekara mańy yntymaqtastyǵy damýda. Almaty jáne Jambyl oblystarynyń aýmaqtyq polısııa bólimsheleri kórshiles respýblıkanyń Ystyqkól, Shý jáne Talas oblystaryndaǵy qyrǵyz áriptesterimen tyǵyz qarym-qatynasta.
«Eki eldiń ishki ister organdarynyń yntymaqtastyǵy joǵary deńgeıde. 2015 jyldan bastap úılestirý jumys toby jumys isteıdi, onyń quramyna ákimshilik, krımınaldyq polısııa, kóshi-qon qyzmeti jáne basqa da bólimshelerdiń ókilderi kiredi. Bizdiń mamandar birlesken operasııalar men is-sharalardy júrgizip, qylmystardy birge zerdeleıdi, qylmystyq toptardyń áreketterin, esirtkini tasymaldaýdy, zańsyz kóshi-qon arnalaryn anyqtaıdy jáne jolyn kesedi. Bul baǵyttaǵy jumys toqtap qalmaýy tıis, óıtkeni ishki qaýipsizdik qana emes, jalpy Ortalyq Azııa qaýipsizdigi de osyǵan baılanysty», dep atap ótti Qazaqstan IIM basshysy Erlan Turǵymbaev.
Taraptar eki eldiń polısııa vedomstvolarynyń qaýipsizdikti qamtamasyz etý jáne qylmysqa qarsy kúres, onyń ishinde transulttyq jáne uıymdasqan nysandar boıynsha tyǵyz baılanys jalǵasatynyn atap ótti.