Batysqazaqstandyq halyqtyq jáne áýesqoı teatrlardyń ókilderi jaqynda Shymkent qalasyna baryp qaıtty. Rejısserlar men akterlardan quralǵan shyǵarmashyl top ońtústik óńirdegi áriptesterimen júzdesip, tájirıbe almasty.
Batys Qazaqstan oblystyq halyq shyǵarmashylyǵy ortalyǵy uıymdastyrǵan bul sapardyń mán-mańyzy erekshe bolypty. «Naýryz Shymkentte bastalady» jobasy aıasynda ótken sharalarǵa tap kelgen shyǵarmashylyq quram Shymkent qalalyq salt-dástúrler ortalyǵynda sheberlik saǵatyna qatysyp, kóptegen qundy málimetke qanyqty.
- Elimizde úshinshi megapolıs atanǵan Shymkent shaharynyń tarıhy, qasıetti jerleri adamǵa oı salady eken. Osy saparymyz ózińdi de, aınalańdy da jańasha tanýǵa jeteleıtin sátterge toly boldy, - deıdi qaztalovtyq rejısser Danagúl Jumabaeva.
Qaı salada bolmasyn, tájirıbe almasý – kásibı qajettilik. Jumat Shanın atyndaǵy akademııalyq qazaq drama teatrynda belgili dramatýrg Saıa Qasymbektiń «Naýryz kóne Shymqalada» tańǵajaıyp hıkaıatyn tamashalaǵan batysqazaqstandyqtar qoıylym sońynda avtormen, teatrdyń kórkemdik jetekshi jáne qoıýshy rejısserimen, akterlermen kezdesti. Osyndaı áriptestik júzdesý ázil-syqaq jáne satıra teatrynda Nıl Saımonnyń «Áýmeserler» komedııasyn, qalalyq qýyrshaq jáne jasóspirimder teatrynda «Naýryz dýman» ertegisin, orys teatrynda Grıgorıı Gorınanyń «Atyń óshsin, Gerostrat» tragıkomedııasyn tamashalap, talqylaýmen jalǵasty. Oraldyqtar shymkenttik áriptesteriniń eńbekqorlyǵyna, shyǵarmashylyq sheberligine tánti boldy. «Ǵımaraty kishkentaı bolǵanyna qaramastan qýyrshaq jáne jasóspirimder teatry úlken jumys atqaryp otyr eken. Dekorasııa, tigin sehy, rekvızıt áleminiń tııanaqtylyǵynan kóp sabaq aldym. Ásirese óz jumysyn bastan-aıaq jalyqpaı túsindirgen rejısserge alǵysym sheksiz. Ońtústik saparynda eń úlken áserdi osy jerden taptym» deıdi Bórli aýdanynyń halyqtyq «Murager» teatrynyń rejısseri Ásel Moldaǵalıeva.
Shymkent ortalyqtandyrylǵan kópshilik kitaphanalar júıesiniń Abaı atyndaǵy ortalyǵynda qalalyq ál-Farabı ǵylymı kitaphanasynyń merzimdi basylymdar bóliminiń meńgerýshisi Tańsholpan Sáýlembaı, Túrkistan fılarmonııasy sýretshi-dızaıneri Maqsat Aıdúısenov, Shymkent qalalyq Qoǵamdyq kelisim jáne mádenı is-sharalar bólim meńgerýshisi Ázıza Isaeva qatysqan kezdesý de batysqazaqstandyqtar úshin óte paıdaly boldy. О́z isiniń mamandary atqarylǵan ár sharaǵa rejısserlik, akterlik taldaý jasap, usynystarmen pikirlerin aıtty.
Sapar barysynda meımandar Shymkent qalasynyń turǵyny, óner janashyry Kendebaı atanyń etno-mýzeıinde bolyp, ataıdyń óz qolymen jasaǵan mýzykalyq aspaptaryy men qysh qumyralaryn tamashalady. Erekshe ónerli jan 18 túrli aspapta oınaıtynyn kórsetip, sheberlik saǵatyn da ótkizip úlgeripti.
- Shymkenttegi saıası qýǵyn- súrgin murajaıy erekshe áser berdi. Mýzeıge kirgen sáttegi kózime Ábdilda Tájibaevtyń óleń joldary tústi:
At degen kim?
Atqan qaısyń?
Qanym qaıda tógilgen?
Qabirim qaıda kómilgen?! – Bul máni de, maǵynasy da erekshe óleńnen sonaý qanquıly jyldardyń oqıǵasy, onyń jazyqsyz qurbany bolǵan azamattardyń esimderi kóz aldymyzǵa kelgendeı... Qazaqtyń basyna túsken sonaý náýbet zaman eskertkishteri, Alash zııalylarynyń hattary, eńbekteri, olardyń fotosýretteri, sol zamannan saqtalǵan eski gazetter saqtalǵan eken. Osynyń bárin mýzeı qyzmetkeri tolyqtaı tanystyryp ótti. Tatıana Nevadovskaıanyń ashtyqtan qaıtys bolar aldyndaǵy qazaq jigitiniń qasyndaǵy fotosýreti de áserli boldy. Sońynda kórsetilgen «Asharshylyq» taqyrybyndaǵy derekti fılm de bizge tarıhı tyń derekter syılady, - deıdi Shyńǵyrlaý aýdandyq mádenı-demalys ortalyǵynyń rejısseri Jalǵasbek Myrzagereev.
Naýryzdyń 14-inde jańa jyldy qol alysyp, kórisip bastaıtyn batysqazaqstandyqtar naýryz-toıdyń ońtústikte erekshe keń kólemde atqarylatynyna kýá boldy. Túrkistan qalasynyń etnoaýylynda ótken Naýryz toıda Jibek joly kóshi jańasha jolǵa shyqsa, alańda pisirilgen 2 tonna naýryzkójeniń dámi de erekshe boldy.
- Bul sapar bizge kóptegen jańa áser, paıdaly bilim syılady. Ásirese bizdeı meımanǵa aıaǵynan tik turyp qyzmet qylǵan barlyq mekeme basshylary men jaýapty mamandaryna alǵysymyzdy aıtamyz. Ásirese barǵan kúnnen bizge baǵyt-baǵdar berip, maǵynaly jospar syzyp, ár kezdesýimizdi paıdaly ótkizgen ázil-syqaq jáne satıra teatrynyń rejısseri Samat Altaı myrzaǵa erekshe yqylasymyzdy bildiremiz, - deıdi Batys Qazaqstan oblystyq halyq shyǵarmashylyǵy ortalyǵynyń kórkemdik jetekshisi Araı Ihsanova.