Qyrǵystannyń astanasy – Bishkekte dzıýdodan Azııa men Muhıt jaǵalaýy elderiniń birinshiligi bastaldy. Bul jarysqa 30 memleketten kelgen 215 balýan baq synaýda, dep habarlaıdy Egemen.kz.
Erler arasyndaǵy 60 kılo salmaqtaǵy saıysta Eldos Smetov ıordanııalyq Bilál Almansaýrdyń aıaǵyn kókten keltirdi. Kelesi kezeńde ol qyrǵyzstandyq Qýanyshbek Aıbekulymen kúsh synasady. Al Ǵusman Qyrǵyzbaev oıda-joqta aýstralııalyq Djoshýa Ketsten utylyp qaldy.
66 kılo salmaqtaǵy Eldos Jumahanov fılıppındik Shýgen Nakanonyń osal tusyn ońaı tapty. Qandasymyzdyń kelesi qarsylasy – Aýstralııanyń taǵy bir ókili Natan Kets.
Áıelder arasyndaǵy asa jeńil salmaqta Ábıba Ábýjaqynova alǵashqy eki kezeńnen súrinbeı ótti. Ol qyrǵyzstandyq Janar Joldasheva men úndistandyq Devı Lakmabamnen aılasyn asyrdy. Endi Ábıda ózbekstandyq Gúlnur Muratbaevamen sheberlik baıqasady. Al Otgonseseg Galdabrah jarys jolyna shyqpady.
52 kılo salmaqtaǵy qos arýymyz da tusaýkeser kezdesýlerinde jeńilistiń kermek dámin tatty. Ǵalııa Tynbaeva ózbekstandyq Sıta Qadamboevaǵa, Nursulý Eralıeva koreıalyq Park Da Solǵa jol berdi.
57 kılo salmaqtaǵy Sevara Nıshanbaeva sanaýly mınýttardan keıin Qyrǵyzstannyń dzıýdoshysy Abına Qoshqonbaevamen kúsh synasady.