Prezıdent Ákimshiliginiń bastamasymen «Janýarlarǵa jaýapkershilikpen qaraý týraly» zań jobasy talqylandy. Is-sharaǵa Prezıdent Ákimshiligi ókilderi, Parlament Májilisiniń depýtattary, Premer-Mınıstr Keńsesiniń, Ekologııa, geologııa jáne tabıǵı resýrstar mınıstrliginiń jáne basqa da memlekettik organnyń ókilderi, zoobelsendiler qatysty.
«Bul Memleket basshysynyń tapsyrmasy jáne ol Prezıdent Ákimshiliginiń erekshe baqylaýynda. Bizdiń mindetimiz – jan-jaqty pysyqtalǵan jáne tıimdi jumys isteıtin zań alý úshin tapsyrmany merziminde jáne sapaly oryndaý», dep atap ótti Prezıdent Ákimshiliginiń Strategııalyq josparlaý bólimi meńgerýshisiniń orynbasary Oljas Joraev.
Keńes barysynda zań jobasynyń daýly normalary egjeı-tegjeıli qaralyp, janýarlardyń mártebesi jáne olardy qorǵaý sharalary talqylandy. Sonymen qatar ilespe zań jobasyn iske asyrý týraly da sóz boldy. Parlament Májilisiniń depýtattary Eldos Abaqanov pen Vera Kım zańdy ýaqtyly qabyldaý úshin mınıstrlikpen, memlekettik organdarmen jáne zooqorǵaýshylarmen tyǵyz ózara is-qımyl jasaýǵa ázir ekendikterin bildirdi.
Talqylaý qorytyndysy boıynsha azamattyq sektor men múddeli memlekettik organdardyń pikirin eskere otyryp, Parlament Májilisindegi jumys toby sheńberinde negizgi jáne ilespe zań jobalary boıynsha birlesken jumys júrgizý usynyldy.
Eske sala keteıik, Memleket basshysy Qasym-Jomart Toqaevtyń tapsyrmasy boıynsha Ekologııa, geologııa jáne tabıǵı resýrstar mınıstrligi zoobelsendilermen, qoǵam ókilderimen birlesip «janýarlarǵa jaýapkershilikpen qaraý týraly» zań jobasyn ázirledi. Qujatta janýarlarǵa jaýapkershilikpen qaraýdy jáne olarǵa adamgershilikpen qaraýdy qalyptastyrýǵa baǵyttalǵan normalar bar.