Búgin Halyqaralyq Túrki akademııasynyń prezıdenti Darhan Qydyráli men Qazaqstan Respýblıkasynyń Tuńǵysh Prezıdenti – Elbasy kitaphanasynyń dırektory Baqytjan Temirbolat kezdesip, ózara áriptestik týraly memorandýmǵa qol qoıdy, dep habarlaıdy Egemen.kz Halyqaralyq Túrki akademııasynyń baspasóz qyzmetine silteme jasap.
Kezdesý barysynda taraptar yntymaqtastyqty odan ári damytý jóninde pikir almasty.
Atalǵan memorandým taraptarǵa Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń túrki ıntegrasııasyn qalyptastyrýdaǵy jáne damytýdaǵy rólin zerdeleý boıynsha birlesken ǵylymı-zertteý jobalaryn júzege asyrýǵa múmkindik beredi.
Elbasy kitaphanasynyń dırektory Baqytjan Berikbaıuly Túrki akademııasy tarapynan atqarylyp jatqan jumystardy joǵary baǵalap, akademııa basshysynyń arnaıy kelýine rızashylyǵyn bildirdi.
«Túrki keńesiniń Qurmetti Tóraǵasy bolyp sanalatyn Nursultan Nazarbaev ıdeıalaryn júzege asyrý Túrki akademııasynyń da mańyzdy maqsaty. Sondyqtan bul baǵytta Elbasy kitaphanasy bizdiń senimdi seriktesimiz bola alatyny sózsiz», dedi Darhan Qydyráli.
Memorandýmǵa saltanatty qol qoıý rásiminen soń Darhan Qydyráli Túrki akademııasy ár jyldarda shyǵarǵan 70 ǵylymı eńbekti Elbasy kitaphanasy qoryna syıǵa tartty.