Kún raıynyń kúrt jylynýyna baılanysty elimizdiń óńirlerinde sý basý qaýpi saqtalýda. Osyǵan qatysty sý qoımalarynda daıyndyq jumystary myqtap qolǵa alyndy. Bul týraly Ekologııa, geologııa jáne tabıǵı resýrstar mınıstriniń orynbasary Serik Qojanııazov habarlady.
«Qazgıdromettiń» málimetine súıensek, Qazaqstannyń basym bóliginde qar erý úrdisi jalǵasyp jatyr. Qyzylorda, Atyraý jáne Mańǵystaý oblystary aýmaǵynda jáne Túrkistan, Jambyl, Almaty oblystarynyń jazyq jerlerinde qar túgeldeı erip ketken. Alaıda respýblıkanyń taýly óńirlerinde (Shyǵys Qazaqstan, Almaty, Jambyl jáne Túrkistan oblystarynda) tasqyn qaýpi qar erý jáne jaýyn-shashyn kezinde de saqtalady.
«Osy kóktemde sýyq kúnderdiń sozylýyna baılanysty qar ádettegiden baıaý eridi. Osyǵan baılanysty, Qaraǵandy, Aqmola, Soltústik Qazaqstan, Qostanaı, Aqtóbe, sondaı-aq Batys Qazaqstan oblystarynda qar áli de tolyǵymen erigen joq. Aýa raıy kúrt jylynyp, nóserli jaýyn jaýsa, atalǵan óńirlerdi sý basýy múmkin. Syrdarııa jáne Ile ózenderi muzdan tolyǵymen tazardy. Ertis ózeniniń Shyǵys Qazaqstan jáne Pavlodar oblystary aýmaǵynda muz erý jalǵasyp, bul seń keptelisine jáne sýdyń jaıylma aýmaqtaryna shyǵýyna soqtyrýy múmkin. Tutastaı alǵanda, bıyl 2015-2017 jyldar aralyǵyndaǵy sııaqty tabıǵı apattar kútilip otyrǵan joq. Biraq ta kún raıynyń kúrt qubylýy saldarynan qatty jaýyn-shashyn bolsa, Qaraǵandy, Aqmola, Soltústik Qazaqstan, Qostanaı, Almaty, Túrkistan, Jambyl jáne Shyǵys Qazaqstan oblystaryn ishinara sý basýy múmkin», dedi S.Qojanııazov.
Sol sebepti tasqyn sýdan keletin qaýiptiń aldyn alý maqsatynda Sý resýrstary komıtetinde sý tasqynyna qarsy komıssııa qurylǵan. Mundaı komıssııalar «Qazsýshar» kásiporny men onyń fılıaldarynda da jumys istep jatyr.
«Gıdrotehnıkalyq nysandardy paıdalaný qaǵıdalaryna sáıkes kez kelgen sý qoımasynda ony toltyryp, kútiletin túsimderge baılanysty sý tasqynyn ótkizý kestesi ázirlendi. Qaýipti kezeń bastalǵanǵa deıin tasqyn sýlardy jınaqtap, qarqyndy sý tasqyny kezindegi manevr úshin sý qoımalarynda bos syıymdylyqtar qory qamtamasyz etildi. Búginde iri sý qoımalaryndaǵy ortasha sýdyń kólemi 70-75%-dy qurap otyr. Bular jobalyq kólemge deıin toltyrylady jáne úlken tasqyn kelgen jaǵdaıda tranzıttik rejimde jumys isteıtin bolady», dedi vıse-mınıstr.
Mınıstrdiń orynbasary aıtqandaı, sý qoımalarynyń jumys rejimine kúndelikti monıtorıng belgilenip, respýblıkalyq nysandarda táýlik boıy kezekshilik uıymdastyrylǵan. Qaýipti ýchaskelerde qurylys jáne basqa materıaldardyń qajetti qorlary, sondaı-aq tıisti tehnıka men janar-jaǵarmaı materıaldarynyń qory jetkilikti.
«Kommýnaldyq jáne jeke gıdrotehnıkalyq nysandarda bos syıymdylyqtardy ulǵaıtý, ózender arnalaryn tazalaý, ınjenerlik qorǵanystardy jóndeý jáne qurý boıynsha buryn berilgen usynymdardyń oryndalýyn baqylaý zertteýleri júrgizilýde. Jaýǵan qardyń úlken kólemin eskerip, qar kúrt erigen jaǵdaıda sý qoımalarynan aǵyzylatyn sý kólemi edáýir artatyny sózsiz. Osyǵan baılanysty jergilikti atqarýshy organdar eldi mekenderge jaqyn ornalasqan sý qoımalarynan aǵyzylatyn sýdy burýǵa qajet arnalardyń ótkizý qabiletin ulǵaıtý jónindegi jumystardy jedeldetip, kúsheıtýi qajet», dedi vıse-mınıstr.
S.Qojanııazov sý qoımalarynyń bos syıymdylyqtaryn qalyptastyrýmen qatar, arnalar tazalanǵan jaǵdaıda ǵana yqtımal apatty shyǵynsyz ótkerý múmkin ekenin aıtty.