Jaryq dúnıe esigin asha salysymen qatal taǵdyr qyryna alǵan. Aıaq súıekteri álsiz bolyp týypty. Qarǵa adym jer júrý túgili qybyrlap qozǵalýǵa murshasy kelmeıdi. Qorǵasyndaı aýyr salmaq eńsesin basyp, tusaý salyp tastaǵandaı. Biraq boıyndaǵy alapat jigeriniń arqasynda qatardan qalmaýǵa taǵdyrymen taıtalasyp tyrysyp-aq kele jatyr...
Jasy otyzǵa endi ilikken Ivan Pavlovıch Balkashın aýylynyń týmasy. Jigerli jigitti mundaǵy eldiń bári tanıdy. Qolarbada qadalyp otyratyn, arnaıy súıenish quralynsyz qadam basa almaıtyn múmkindigi shekteýli jan bolsa da áldekimniń esirkegenin jany jaqtyra bermeıdi.
Bul nege bireýler aıaıtyndaı, kembaǵal kóretindeı miskin bolýǵa tıis. Jaratqan ıe mańdaıyna osylaı jazǵan eken, peshenesine buıyrǵanyn ózi kóredi de. Tek jiger jasymaýy kerek. Ivannyń aǵynan aqtarylǵan sózinen uqqanymyz osy. Tyrbanyp tirshilik etý úshin qolynan keletin kásipti ıgerýge tyrysqan. Osydan úsh jyl buryn kompıýter jóndeıtin seh ashypty.
Qurqyltaıdyń uıasyndaı jyp-jyly, kishkentaı ǵana bólme. Tóńireginde áldebir sheberhanalardaǵydaı atkópir bolyp shashylyp jatqan basy artyq zat ta joq. Qaı tarapqa qarasań da jınaqy qoldyń taby menmundalap aıqyn kórinip tur. Kezegin kútip jatqan smartfondar men kompıýterler de az emes. Soǵan qaraǵanda, qoly epti Ivan Pavlovıchtiń qyzmeti halyqtyń kádesine jarap-aq tur deýge bolar.
– Orta mektepti oıdaǵydaı aıaqtaǵan soń elordadaǵy kásiptik bilim beretin kolledjerdiń birinde tehnık-baǵdarlamashy mamandyǵyn ıgerdim, – deıdi sheberdiń ózi, – qazirgi zamanda suranysqa ıe mamandyq qoı. Bilimdi qashyqtan oqyp meńgersem de, tájirıbemen ushtastyrǵanym utymdy boldy. Onyń ústine qazir úırenemin degen adamǵa esh nárseniń qıyndyǵy joq qoı. Barlyǵy ınternet áleminde saırap tur. Kóńiliń qalaǵandy taýyp alasyń da, qyr-syryn jadyńa jattaısyń. Tek boıyńda yntań men yqylasyń bolsa jetip jatyr.
Qolyna armandaǵan dıplomy tıgen soń aýdan ortalyǵyndaǵy «Qazaqtelekom» AQ fılıalynda memlekettik baǵdarlama boıynsha alty aı tájirıbeden ótken. Keıin ártúrli salada qyzmet etipti. Áıtse de, densaýlyǵyndaǵy kináraty shamaly bóget bolǵan. Jumys berýshiniń qasy men qabaǵyna qaraý, tilimen aıtpasa da túrinde turǵan keıisti kórý ońaı emes eken. Táýekelge bel býyp óz isin bastaýǵa jetelegen de osy jaı. Tek aqparattyq tehnologııa kún saıyn qarqyndy damýǵa ıe bolyp jatqan jańa zamannyń josyǵyna saı bola bilý kerek. Bul tarapta keıipkerimizdiń boıynda erekshe eńbekqorlyqtyń, aıryqsha izdenimpazdyqtyń bar ekendigin ańǵaryp, tas jarǵandaı talabyna tánti boldyq. Isiniń alǵa basýy da osy bir qasıetterdiń moldyǵynan.
– Memleket tarapynan jap-jaqsy kómek kórsetilip jatyr, deıdi ol, – umtylǵan adamǵa budan artyq ne kerek. Máselen, osy ýaqytqa deıin eki utymdy joba jasap, eki grantqa ıe boldym. Alǵashqy joly 250 myń teńge qarajat bólinse, ótken jyly 2,5 mln teńge kóleminde qaıtarymsyz grantqa qolym jetti. Osy qarjyǵa kúndelikti kásibime qajetti ártúrli quraldar men kompıýterlik baǵdarlamalar alyp, kóp-kórim alǵa bastym. Buryn taptyrmaı júrgen dúnıeler qolyma tıgen soń sharýam da ońǵaryla bastady. Azdap qarajat jınaǵan soń ortalyqtan jalǵa oryn alýdyń múmkindigi týdy. Shynyn aıtaıyn, kásip ıgermeı bos júrgen on eki múshesi saý jastardy kórgende tańǵalatynym ras. О́zim qazir bir bıikke shyqtym, áldenege qolym jetti degendikten emes, adamǵa masyl bolýdyń óte uıat ekendigin uqpaıtyndaryna nalımyn.
Aldynan jumys úrkip otyratyn Ivan Pavlovıch qazir aýdan ortalyǵyndaǵy birneshe mekemelermen kelisimshart ta jasap qoıypty. Kelisim boıynsha kompıýterleriniń jumys isteýin baqylap, ýaqtyly tekserip, qajetti qyzmetin kórsetedi eken. Aýyl-aımaqtan demep kelip jatqandar da az emes. О́zine laıyq mamandyqtyń jiligin shaǵyp, maıyn ishken maman kompıýterlerdi, teledıdarlardy, smartfondar men planshetterdi jóndep, ınternetke qosylý máselesin sheshýge kómektesedi. Tapsyrys túsip jatsa, árqıly aqparattyq baǵdarlamalardy ıgerýge járdemdesip, draıverler men mekeme ishindegi jelilerdi de ornatyp beredi. Kúndelikti oryn alyp jatatyn árqıly tehnıkalyq aqaýlardy da jóndeýge qabiletti.
О́mirden óz ornyn tapqan osy bir janmen atústi áńgime-dúken qurǵanda, tolaıym túgel bolmasa da, biraz jaıǵa qanyqtyq. Jigitti jaqsylyqqa jetektegen jiger eken. Qashanda azamatqa jigerli bolǵan jarasady emes pe?!
Aqmola oblysy,
Sandyqtaý aýdany