Muǵalimderge vaksına saldyrýdy mindettemeıdi. Bul týraly Bilim jáne ǵylym mınıstri Ashat Aımaǵambetov Ortalyq kommýnıkasııalar qyzmetinde ótken brıfıngte aıtty. Muǵalimder arasynda ekpe alýdy mindettemese de saldyrǵandar bar eken.
«Densaýlyq saqtaý mınıstrliginiń deregine súıensek, osyǵan deıin vaksına saldyrǵan qazaqstandyqtardyń 17 paıyzy muǵalimder eken. Osydan-aq olardyń ekpe alýǵa degen belsendiligin kórýimizge bolady. Degenmen vaksınalaý barlyq azamatqa, sonyń ishinde muǵalimderge de erikti túrde júrgiziledi. Oǵan eshkim májbúrlemeıdi. Biraq men mınıstr retinde áriptesterimdi, pedagog qaýymdy ekpe alýǵa, ǵylymǵa senýge shaqyramyn. О́ıtkeni bul – eń aldymen muǵalimderdiń, sodan soń oqýshylardyń, ujymnyń, túptep kelgende qoǵamnyń qaýipsizdigi. Men de ǵylymǵa senemin, bul – ǵylymnyń úlken jetistigi. Sondyqtan ózim de alǵashqylardyń biri bolyp vaksına saldyrdym», dedi A.Aımaǵambetov.
Vedomstvo basshysy brıfıng barysynda oqýshylardyń mektepke qashan oralýy múmkin ekenin de jetkizdi.
«Balalardyń mektepke oralýy vaksınalaý men karantındik shekteýlerdiń saqtalýyna baılanysty. Pandemııaǵa qatysty jaǵdaı jaqsarǵan kezde jáne el óńirleri KVI-diń taralý deńgeıi boıynsha «sary», sodan keıin «jasyl aımaqtarǵa» ótkende. Ádette, «jasyl aımaqtaǵy» óńirlerde balalardyń barlyǵy derlik mektepte bilim alýǵa quqyly. Barlyǵyn ózimizdiń áreketimiz sheshedi. Sebebi bul – bárimizge ortaq másele. Eger barlyq adam sanıtarlyq dárigerlerdiń talaptary men usynystaryn oryndasa, balalar mektepke tezirek oralady», dedi mınıstr.
Budan bólek, A.Aımaǵambetov otandyq vaksınanyń ázirlený barysyna da toqtaldy.
«Bizdiń ǵalymdar koronavırýstyń «brıtandyq», «ońtústikafrıkalyq» shtamdary boıynsha zertteý júrgizip jatyr. Shyn máninde olardyń eńbegi ólsheýsiz, qazirgi tańda kúni-túni tynbaı jumys isteýde. Otandyq vaksınaǵa kelsek, kóp qazaqstandyqtyń asyǵa kútip otyrǵanyn bilemiz. Degenmen sál sabyrlyq tanytyp, ǵalymdarymyzǵa qoldaý kórseteıik. О́ıtkeni qazir tıisti standarttar boıynsha jumystar atqarylyp jatyr. Bıologııalyq qaýipsizdik problemalary ǵylymı-zertteý ınstıtýty ázirlegen vaksınaǵa qatysty barlyq rásim bekitilgen kestege sáıkes júrgizilip otyr. Bul rette eshqandaı problema joq. Bizdiń áriptester 50 myń doza boıynsha qajetti jumystar júrgizdi. Hattama boıynsha únemi hımııalyq taldaý men bıologııalyq qadaǵalaý jasalady. Qazir bıologııalyq qadaǵalaýdy aıaqtap jatyr. Kestege sáıkes, bıylǵy sáýir aıynyń sońyna qaraı, 20-synan keıin qujattardy Densaýlyq saqtaý mınıstrligine tapsyramyz. Olar nátıjelerge taldaý jasaı otyryp, tıisti sheshim qabyldaıdy», dedi vedomstvo basshysy.