2021 jyly joǵary oqý ornynan keıingi bilim berý baǵdarlamalaryna túsý erejelerine ózgertýler engizildi. Endi doktorantýraǵa qabyldaý elektrondy formatta júzege asyrylady. Byltyr bul tásil magıstratýraǵa qabyldaý kezinde tıimdiligin kórsetti.
Bilim jáne ǵylym mınıstrligi baspasóz qyzmetiniń málimeti boıynsha, bıyldan bastap doktorantýraǵa qabyldaý emtıhany elektrondy formatta júrgiziletin bolady. Úmitkerler kompıýterde otyryp esse jazady, doktorantýrada oqýǵa daıyndyǵyn rastaý úshin test tapsyrady jáne bilim berý baǵdarlamasy tobynyń beıini boıynsha emtıhan tapsyrady.
«Bıyl doktorantýraǵa túsý erejelerine birqatar ózgeris engizildi. Doktorantýraǵa qabyldaý emtıhany alǵash ret testileý ortalyqtarynyń bazasynda derbes kompıýter arqyly elektrondy formatta ótedi. О́tken jyly bul tásil magıstratýraǵa qabyldaý kezinde qoldanylǵan bolatyn. Bul – qabyldaý emtıhandary tek testileý formatynda ótedi degen sóz emes. Bolashaq doktoranttar joǵary oqý oryndary bekitken taqyryptar boıynsha esse jazady. Qabyldaý emtıhanynyń qorytyndy baǵasy esse, doktorantýrada oqýǵa daıyndyq testi jáne beıindi emtıhan baǵalarynyń jıyntyǵy bolyp tabylady», dedi BǴM Joǵary jáne joǵary oqý ornynan keıingi bilim departamentiniń dırektory Ádilet Toıbaev.
Doktorantýraǵa ótinish qabyldaý 3 shildede bastalyp, 3 tamyzǵa deıin jalǵasady. Doktorantýraǵa túsý emtıhandary 4-20 tamyz aralyǵynda ótedi.
Magıstratýraǵa keshendi testileýge ótinish BǴM Ulttyq testileý ortalyǵynyń saıty arqyly 1 maýsym men 15 shilde aralyǵynda qabyldanady. Keshendi testileýdiń qorytyndysy boıynsha kýálik elektrondy túrde testilenýshiniń jeke kabıneti arqyly beriledi. Magıstratýraǵa keshendi testileý 20 shildede bastalyp, 10 tamyzǵa deıin jalǵasady. Arab tili boıynsha jáne shyǵarmashylyq emtıhandar 16-25 shilde aralyǵynda ótedi.
Magıstratýra men doktorantýraǵa qabyldaý 28 tamyzda aıaqtalady.
Sonymen qatar Duolingo English Test 2021-2022 oqý jylyna magıstratýra men doktorantýraǵa túsý kezinde shet tilin meńgergenin rastaıtyn halyqaralyq sertıfıkattar tiziminen shyǵarylady.
Shet tilin meńgergendigin rastaıtyn sertıfıkat doktorantýraǵa túsý úshin ǵana mindetti bolyp tabylatynyn atap ketken jón. Magıstratýranyń bilim berý baǵdarlamalaryna túsý úshin halyqaralyq sertıfıkattardy nemese keshendi testileý barysynda shet tilinen emtıhan tapsyrýǵa bolady.