Memlekettik grant ıelenip, jeke isin ashqan tabysty kásipkerler qatary Almaty oblysy Qapshaǵaı qalasynda jyldan jylǵa artyp keledi, dep habarlaıdy Egemen.kz Almaty oblysy ákiminiń baspasóz qyzmetine silteme jasap.
Máselen, kóp balaly ana Baıan Ordabaeva «Atameken» UKP arqyly «Bıznes Bastaý» negizderin oqyp shyqqan. «Bıznestiń jol kartasy» baǵdarlamasy sheńberinde 2,5 mln teńge qaıtarymsyz grant utyp alyp, búginde kondıterlik kásippen aınalysýda.
Jalpy nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasynyń múmkindikteri mol. Qapshaǵaı qalasy ákimdiginiń málimetine qaraǵanda, atalmysh baǵdarlamaǵa «jas kásipker» jáne kóp balaly ana retinde qatysqan Baıan Ordabaeva qolyna bıznes negizderin meńgergeni týraly sertıfıkat alǵan. Budan soń «Úıde pisirilgen nan ónimderin úıde júzege asyrý» bıznes jobasyn qorǵap shyqqan. Sonyń arqasynda ıaǵnı 2,5 mln teńge memlekettik grant ıelenip, jeke isin qolǵa alǵan.
«Bıznesimdi memleket tarapynan kórsetilgen qoldaýdyń arqasynda bastadym. Endi onyń odan ári tabysty júrgizýge talpynys, eńbek, tabandylyqpen qatar, qazirgi ınternet jelisiniń de múmkindikterin mol paıdanyp otyrmyn. Instagram jelisindegi paraqshamda on myńǵa jýyq oqyrmanym bar. Bıylǵy jyldyń naýryz aıynda ózimniń kondıterlik bıznesimdi odan ári keńeıttim, onyń barlyq jańalyqtarymen jáne múmkindikterimen «Bayan_cakes» paraqshasynda oqyrmandarymen tanystyryp otyramyn. Aldaǵy ýaqytta jastarǵa onyń ishinde jumyssyz azamattarǵa óz bilgenimdi úıretip, jańa jumys oryndaryn qurýdy josparlap otyrmyn», dedi jas kásipker.
Qazirgi kezde Baıan Ordabaeva kásibin keńeıtý maqsatynda «Bıznestiń jol kartasy-2025» baǵdarlamasy boıynsha 3,0 mln teńgege deıingi grantqa qatysý josparlap otyr.
Sol sııaqty ótken jyly «Shashtaraz» kýrsyn bitirgen jas talapker Sanjar Meıirmanov ta 200 aılyq eseptik kórsetkish kóleminde grant ıelengen. Ol bul somaǵa shashtaraz mamanyna qajetti barber kreslosyn, sterılızator, qaıshy, shash alǵysh mashınka syndy qural-jabdyqtar satyp aldy. Qazir sán salonynda osy kásibinen násibin taýyp júr. Bolashaqta shashtaraz mamandyǵyna oqytatyn kýrs ashyp, óziniń jeke sán salonyn ashýdy armandaıdy.
Jalpy Qapshaǵaı qalasy boıynsha «Atameken» kásipkerler palatasy arqyly «Bastaý Bıznes» jobasy boıynsha kásipkerlik negizderine oqytý kýrstaryna 150 adamdy oqytý josparda bar. Jáne jańa bıznes-ıdeıalaryn iske asyrý maqsatynda 200 AEK kóleminde 45 adamǵa memlekettik grant jáne 25 adamǵa shaǵyn nesıe berý mejelengen. Osy jyldyń 1 sáýirine deıin 30 adamǵa memlekettik grant, 3 azamatqa shaǵyn nesıe berilgen.