Qazaqstanda derbes derekterdi qorǵaý salasyndaǵy ýákiletti organ ótken jyly jazda ǵana belgilendi. Bul fýnksııalardy Sıfrlyq damý mınıstrliginiń Aqparattyq qaýipsizdik komıteti atqarady.
Ortalyq kommýnıkasııalar qyzmetinde ótken brıfıng barysynda aqparattyq qaýipsizdik komıtetiniń tóraǵasy Rýslan Ábdiqalyqov júrgizilgen taldaý jumystarynyń qorytyndysyna toqtaldy.
Onyń aıtýynsha, azamattar kóbinese derbes derekterdi ashyq qoljetimdilikte taratatyn kommersııalyq ınternet-resýrstarǵa shaǵymdanady. Iаǵnı, izdeý júıesinde adam óziniń tegi men atyn engizgende, jaýap retinde ózi týraly málimetter saqtalǵan saıttarǵa siltemeler shyǵady: JSN, týǵan kúni men jeri, bar bolsa, sot sheshimderi kórinedi.
«Osyǵan baılanysty biz memlekettik organdarǵa, sondaı-aq jeke ınternet-resýrstarǵa qatysty artyq derekterdi jalpyǵa qoljetimdi resýrstarda jarııalaýdyń jolyn kesý boıynsha sharalar qabyldadyq. Qarjy mınıstrligi Memlekettik kirister komıtetiniń «Salyq tóleýshini izdeý» servısinde TAÁ terý kezinde JSN usyný bóliginde jumys isteýi rettelgen jáne kerisinshe. Qazirgi ýaqytta servıs tek jeke kásipkerler men zańdy tulǵalardy izdeý úshin ǵana qoljetimdi, zańsyz alynǵan derbes derekterdi taratatyn eki jeke menshikti ınternet-resýrs ákimshilik jaýapkershilikke tartyldy. 20 AEK kóleminde aıyppul salyndy», dedi R. Ábdihalyqov.
Derbes shekarany buzýshylar arasynda kommýnaldyq qyzmetter, PIK, TQK jáne MIB bar. Olar boryshkerlerdiń tizimderin kireberisterge ilip, chattarǵa taratady. Kóbinese bul tizimder jeke derekterdi qamtıdy: ıesiniń aty-jóni, meken jaıy, telefondary.
«Mundaı derekterdi taratý artyq bolyp tabylady jáne eger olar zııankesterdiń qolyna tússe, olardy zııan keltirý maqsatynda paıdalanýǵa ákep soǵýy múmkin. Osylaısha, WhatsApp messendjeriniń chattarynda turǵyndardyń derbes derekterin zańsyz taratqany úshin elordalyq turǵyn úı keshenderiniń 2 basqarýshy uıymy ákimshilik jaýapkershilikke tartyldy, 20 AEK kóleminde ákimshilik jaza qoldanyldy. Úshinshiden, qandaı da bir tásilmen derbes derekterdi zańsyz taratqan jekelegen adamdarǵa shaǵymdar kelip túsedi. Mysaly, laýazymdy tulǵalar derbes derekteri bar qujattardy úshinshi tulǵalarǵa zańsyz beredi nemese qorǵaý sharalaryn saqtamaıdy, bul derbes derekterdiń jaıylyp ketýine ákep soǵady. Atalǵan is-áreketter úshin 100 AEK kóleminde 6 kommersııalyq uıym jáne memlekettik organnyń 1 laýazymdy tulǵasy 500 AEK mólsherinde jaýapkershilikke tartyldy», dep atap ótti spıker.
Budan basqa, ótinishter negizinde zańsyz taratylǵan 30-dan astam azamattyń derbes derekteri jalpyǵa qoljetimdi aqparat kózderinen alyndy.