Jańa joba bolashaqta 7 federasııany ortaqtastyrmaq, dep habarlaıdy Egemen.kz QFF baspasóz qyzmetine silteme jasap.
Qazaqstan, Túrkmenstan, О́zbekstan, Qyrǵyzstan, Túrkııa, Ájerbaıjan, Vengrııa sekildi memleketterdiń fýtbol federasııalarynyń basqosýynda QFF atynan bas hatshy Azamat Aıtqojın sóz sóıledi.
«Qazaqstan fýtbol federasııasy 7 qaýymdastyqty biriktirip otyrǵan baýyrlas elder jıynyna qatysýdy zor abyroı sanaıdy. Túrkitildes elderdiń fýtbolynyń birigýi quptarlyq is. Qazaqstan tarapy ortaq jobaǵa atsalysýdan bas tartpaıdy. Endigi jıyndy Túrki dúnıesiniń astanasy Túrkistan qalasynda ótkizýdi usynamyn», dedi QFF bas hatshysy.
Sonymen qatar, jıyn barysynda atalǵan memleketter quramalarynyń bir-birimen joldastyq matchtar ótkizip, túrli jarystar uıymdastyrý máseleleri de talqylandy. Buqaralyq fýtbol men balalar jáne jasóspirimder arasyndaǵy ortaq týrnır ótkizý jaıy da tilge tıek etildi.