Soltústik Qazaqstan oblysynyń Kókshetaý taýynyń silemderinen Aıyrtaý, Imantaý sııaqty tóbeleri kóp aýdan aýmaǵynda jel generatorlary 2021 jyldan bastap elektr qýatyn bere bastaıtyny týraly oblys ákimi Qumar Aqsaqalov eki jyl buryn jarııalaǵan bolatyn.
Bul iske Energo Trust JShS ınvestor bolatyny, 25 generator ornatatyny týraly da naqty aıtylǵan.
Alaıda 2021 jyl bastalǵanyna tórt aıǵa aıaq basqanymen áli kúnge generatordyń jobalyq-smetalyq qujattary (JSQ) jasalmaǵan, tipti jer ýchaskesi de naqty belgilenbegen. Árıne, onyń sebebi kóp, sonyń ishinde jaman indettiń kesiri de tıgeni anyq.
Al jýyrda «Qyzyljar – Adaldyq alańynda» osy joba boıynsha jumystar jandana bastaǵany belgili boldy. Biraq elektr qýatyn óndirý eki jylǵa shegerilip, 2023 jylǵa qaldyrylypty. Sońy sátti bolsa oǵan da kónýge bolady...
Eger bul joba tolyǵymen iske asyp ketse jylyna 50 megavatt elektr qýatyn óndirmek. Salystyrý úshin aıtar bolsaq, qazir Aıyrtaý aýdany bar bolǵany 6-7 MVt elektr qýatyn jumsaıdy eken. Qalǵanyn satylymǵa shyǵarsa oblys ekonomıkasynyń qýattylyǵy da arta túser edi.
Soltústik Qazaqstan oblysy