Eýropalyq odaq pen Ortalyq Azııa elderiniń Aýǵanstan boıynsha arnaıy ókilderiniń alǵashqy kezdesýi beınekonferensııa formatynda ótti. Is-shara Aýǵanstan boıynsha keńeıtilgen óńirlik yntymaqtastyqqa, onyń ishinde ortaq bastamalardy ázirleýge arnaldy, dep habarlaıdy Egemen.kz.
Kezdesýge EO-nyń Ortalyq Azııa boıynsha arnaıy ókili Pıter Býrıan, EO-nyń Aýǵanstan boıynsha arnaıy ókili Roland Kobıa, sondaı-aq Qazaqstan, О́zbekstan, Tájikstan men Túrikmenstannyń Aýǵanstan boıynsha arnaıy ókilderi qatysty.
Qazaqstan Respýblıkasy Prezıdentiniń Aýǵanstan boıynsha arnaıy ókili Talǵat Qalıev óz sózinde Qazaqstan Aýǵanstandaǵy jaǵdaıdy turaqtandyrý jónindegi halyqaralyq kúsh-jigerdi árdaıym qoldaıtynyn, bul elge jyl saıyn jan-jaqty kómek kórsetip otyrǵanyn málimdedi.
T.Qalıev Aýǵanstandy qalpyna keltirý úshin keńeıtilgen óńirlik yntymaqtastyqtyń mańyzdylyǵyn atap ótip, eýropalyq seriktesterdiń osy baǵyttaǵy yqpaldastyǵyn joǵary baǵalady.
Kezdesý qorytyndysy boıynsha birlesken málimdeme qabyldanyp, onda qatysýshylar Aýǵanstandaǵy jaǵdaıdy retteý jónindegi barlyq halyqaralyq bastamalarǵa qoldaýyn, sondaı-aq beıbitshilik ornatýǵa úles qosý maqsatynda keń aýqymdy yntymaqtastyqqa ortaq beıildiligin qýattady.