1894 jyldary oqyrmanǵa jol tartqan «Maýglı» shyǵarmasyn bul kúnde bilmeıtin bala joq. Ǵasyr ótse de qunyn joımaıtyn shytyrman oqıǵaly shyǵarma búgin «Jastar» teatrynda sahnalandy, dep habarlaıdy Egemen.kz.
Balalarǵa arnalǵan qýyrshaq qoıylymy bolǵanymen, eresekke de oı salatyndaı-aq eken. Qoıylymdy kórip otyryp, mynaý qoǵamdaǵy ıtis-tartysty kórgendeı bolasyz. Bir-birine aıdap salý, álsizge álimjettik kórsetý, aram jolmen bılikke umtylý, jaǵympazdyq sııaqty adamdar arasyndaǵy quıtyrqy áreketterdi djýnglı zańymen ushtastyra otyryp jetkizgen jazýshy R. Kıplıngtiki sheberlik. Mine, osyny búgin óskemendikter sahnadan kórdi.
Qoǵamda ár nársege tumsyǵyn tyǵyp, ósek-aıańǵa qumar bireý bolsa, qoıylymda ol róldi sabalaq ıt Tabakı somdady. Sabalaq aınalaǵa suqatana kóz tastap, barlyǵyn bilýge qumar. Al «adam balasy djýnglıge qaýip tóndiredi» degen pikirdegi Sherhannyń kózqarasy durys pa dersiń keıde. О́ıtkeni maımyldardyń kósemi aıtqandaı, adamnyń qolynda «qyzyl gúl» bar. Iаǵnı, ot. Bul kúnde adam qolymen tabıǵatqa azǵana qııanat jasalǵan joq. Maýglıdi Akela baýyryna basyp, qasqyrsha ulytqanymen ol – adam balasy. Ańdardyń biri bóligi ony qabyldaǵanymen, endi birqatary djýnglı zańynyń qataldyǵyn eskertedi. Shoıtaban Balý, alysty boljaıtyn Bagıra, aqyly men aılaker Akela árkimniń ózi úshin ómir súrip, qorshaǵan ortanyń qysymyna shydas berer qabiletke ıe bolý kerektigin aıtady. Mynaý biz ómir súrip jatqan zaman da sol emes pe?!
Al osyndaı kúrdeli qoıylymdy qoıǵan ártisterdiń tókken teri óz aldyna, rejısser men sýretshi táýir eńbektengen. Qýyrshaqtardyń kostıýmin nanymdy etip tigý, olardyń qımylyn keltirý óte úlken eńbek. Basty keıipkerdiń rólin somdap shyqqan Tomırıs Amanǵazy er balanyń júrisin salý ońaı bolmaǵanyn aıtady.
– Redıard Kıplıngtiń bul shyǵarmasymen tolyqqandy tanysýǵa tyrystym. Daıyndyq barysynda Maýglıdiń júris-turysyna mán berip, er balasha qımyldadym. Degenmen tusaýkeser oıdaǵydaı ótken sııaqty, – dedi Tomırıs.
Qoıylymnyń rejısseri Syrym Maratbekulynyń aıtýynsha, akterler údeden shyqty, jospar oryndaldy. Bastysy, kórermen rıza.