Almatydaǵy Balýan Sholaq atyndaǵy sport saraıynda áıelder kúresinen Azııa chempıonaty aıaqtaldy. Qazaqstannyń ulttyq quramasy aıtýly jarysty 2 altyn, 1 kúmis jáne 3 qola medalmen qorytyndylap, jalpykomandalyq esepte úshinshi orynǵa taban tiredi. Bul básekede bizdiń qyzdar tek Úndistan men Mońǵolııanyń balýandarynan ǵana qalyp qoıdy.
Áıelder kúresinen Qazaqstan quramasynyń qorjynyna alǵashqy altyndy Valentına Islamova saldy. Osyǵan deıin Azııa chempıonatyna eki márte qatysyp, úshinshi orynnan asa almaǵan saqa sportshy bul joly altyn tuǵyrǵa kóterildi. Bir keremeti, 50 kılo salmaqta óner kórsetken Valentına úsh kezdesýdi de merziminen buryn aıaqtady. Tusaýkeser kezdesýinde úndistandyq Sema Semanyń silikpesin shyǵaryp, aıqyn jeńiske qol jetkizgen ol ile-shala mońǵolııalyq Anýdarı Nandınseseg pen taıpeılik Iýng Hsýn Lınniń sanaýly sekýndtarda tas-talqanyn shyǵardy. Fınalda jerlesimiz ózbekstandyq Jasmına Immaevanyń osal tusyn ońaı tapty. Osylaısha, Azııa chempıony ataný úshin Valentına Islamovaǵa nebári bes-alty mınýt qana jetkilikti boldy.
76 kılo salmaqtaǵy Elmıra Syzdyqova tusaýkeser kezdesýinde álem kýbogy men Azııa oıyndarynyń qola jáne qurlyq birinshiliginiń kúmis júldegeri, qyrǵyzstandyq Aıperi Medetqyzyna ese jiberdi. Sol sátte jerlesimizge endi bas júlde buıyrmaıtyn shyǵar dep oıladyq. Biraq Rıo Olımpıadasynda jeńis tuǵyryna kóterilgen Syzdyqova Almatyda da ózine artylǵan senimdi aqtady. Aınalmaly júıe boıynsha ótken jarysta qatarynan eki qarsylasyn qapy qaldyrǵan ol fınalda Medetqyzymen qaıta kezdesti. Bul joly Elmıra Aıperiniń qos jaýyrynymen kilemge qadady. Taza jeńis! Osylaısha, Alataý bókterinde Qazaq eliniń ánurany ekinshi márte shyrqaldy.
Alǵashqy aınalymda 55 kılo salmaqtaǵy Aısha Ýálıshan koreıalyq Kım Hıýndy qapy qaldyryp, ekinshi kezdesýde mońǵolııalyq Dýlgýn Muńhbold Bolormaǵa ese jiberdi. Úshinshi kezeńde ózbekstandyq Madına Osmonjanovaǵa da Aıshanyń áli jetpedi. Desek te osy jalǵyz jeńistiń ózi jerlesimizge qola medaldi enshileý úshin jetkilikti boldy. Al 59 kılo salmaqtaǵy Dıana Qaıýmova men 68 kılo salmaqtaǵy Anastasııa Panassovıch qatarynan eki kezdesýde sátsizdikke ushyrap, jarysty merziminen buryn aıaqtady.
Kelesi jarys kúni taǵy bes arýymyz boz kilemge shyqty. Solardyń arasynan eń úzdik nátıjege 72 kılo salmaqtaǵy Jámıla Baqbergenova qol jetkizdi. Úndistandyq Dıvııa Kakranǵa ǵana ese jibergen qazaq qyzy kúmis medaldi moınyna ildi. Sheshýshi tusta ol mońǵolııalyq sportshyǵa san soqtyrdy. 53 kılo salmaqtaǵy Asylzat Saǵymbaı men 57 kılo salmaqtaǵy Altynaı Satylǵan qola júldege qol sozdy. Al Irına Kýznesova (62 kılo) men Gaýhar Muqataı (65 kılo) qalyń toptyń arasynda qalyp qoıdy.
Jalpy áıelder kúresinen Azııa chempıonaty 1996 jyldan beri úzdiksiz uıymdastyrylyp keledi. Sol kezden beri 23 márte jalaýy jelbiregen aıtýly jarystyń jalpykomandalyq esebinde bas júlde tek Japonııa men Qytaı quramalaryna ǵana buıyrǵan eken. Kúnshyǵys eliniń arýlary 15 márte teńdessiz dep tanylsa, Aspanasty eliniń burymdylary 8 ret dara shyqty. Alataý baýraıynda ótken dúbirli dodaǵa joǵaryda atalǵan eki memlekettiń qyzdary qatysqan joq. Osy jaǵdaıdy Úndi eliniń sulýlary utymdy paıdalandy. 4 altyn, 1 kúmis jáne 2 qolany oljalaǵan olar jalpy esepte kósh bastady. Ekinshi orynda – Mońǵolııa. Olar 2 altyn, 5 kúmis jáne 1 qolany qorjynǵa saldy. Qazaqstannyń arýlary úshinshi satyǵa jaıǵasty. Bizdiń qyzdar 2 altyn, 1 kúmis jáne 3 qolany enshiledi. Osylaısha, Qazaq eliniń burymdylary óz tarıhyndaǵy toǵyzynshy ret komandalyq saıysta úzdik úshtikti qorytyndylady. Sondaı-aq bul jarysta Qyrǵyzstan (2 altyn, 1 kúmis, 1 qola), О́zbekstan (1 kúmis, 1 qola), Taıpeı (1 kúmis) jáne Ońtústik Koreıanyń (2 qola ) ókilderi jeńis tuǵyryna kóterildi.
ALMATY