Qasıetti Ramazan aıynyń bereketi – tańǵy sáresin ishý. Qazaqsha aıtqanda, «aýyz bekitý» asy. Buny arabsha «sýhýr» deıdi. Sáresi ýaqytynda óte kóp bereketter bar, - deıdi ıslam ǵulamalary. О́ıtkeni, qasıetti aıda sáresin ishý tek musylman balasyna násip bolǵan. Mundaı berekeli as basqa kitap ıelerine buıyrmaǵan.
QMDB Nasıhat jáne qoǵammen baılanys bóliminiń meńgerýshisi Batyrjan Mansurov, oraza kezinde sáresin ishý degenimiz – eń aldymen paıǵambarymyzdyń (s.ǵ.s) súnneti, sol sebepti bulamaldy oryndaǵan adam saýapqa keneledi, deıdi.
Sol sııaqty, úlken sahaba Zaıd ıbn Sabıt (r.a.)jaryqtyq, «shynaıy nıetpen sáresige turý súnnettiń saýabyna keneltedi» dese, taǵy bir ataqty sahaba Amr ıbn As (r.a.) paıǵambarymyzdyń (s.ǵ.s): «Bizdiń oraza men kitap ıeleri orazasynyń aıyrmashylyǵy sáresin ishýde»(Mýslım) nemese «Sáresin ishińder! Rasynda sárelik asta qut-bereke bar» (Buharı) degen hadısterin jetkizgen.
Kelesi kezekte aıtarymyz, sáresin ishý ýaqyty – duǵa-tilek qabyl bolatyn sátke dóp keletindikten, oraza tutýshy bul sátti qalt jibermeı Allanyń sharapaty men qamqorynan úmit eteri anyq. Bul jaıly Quran Kárimniń «Zarııat» súresi, 18-aıatynda: «Olar sáresi ýaqytynda Alladan keshirim tileıdi» degen ashyq úkim bar.
Ekinshiden, sáresin ishken adamǵa – Jaratqannyń meıirimi túsedi. Úshinshiden – sáresi ishken adamǵa perishteler de duǵa jasaıdy. Oǵan dálel retinde ımam baýyrlarymyz «Rasynda Alla Taǵala jáne Onyń perishteleri sáresin ishýshilerge raqym etip, duǵa etedi» degen paıǵambarymyzdyń (s.ǵ.s) hadısin alǵa tartady.
Sáresin ishýdiń tórtinshi bereketi – adamdensaýlyǵyn jaqsarady jáne tánge qýat beredi.Paıǵambarymyz (s.ǵ.s) «Sáresige turyńdar. Densaýlyqtaryń jaqsarady» degen (Buharı).
Qoryta aıtqanda, sáre ýaqytynda musylman balasyna basqa ýaqyttarda násip bola bermeıtin kóptegen bereket bar. Ásirese bul mezgilderde ıstıǵfar aıtyp, Alladan keshirim tilep, táhájjýd namaz oqyp, dúnıe-aqyreti úshin duǵa suraýdyń qabyl bolatyn ýaqyty.
Jaratqan Alla orazamyzdy qabyl etip, sáresiniń bereketin násip etsin!