Energetıka mınıstri N. Noǵaevtyń aıtýynsha 2021 jylǵy 1 qańtardaǵy jaǵdaıǵa sáıkes eldi gazdandyrý deńgeıi 53,07% quraǵan. Elimizdegi 6 162 eldi mekenniń 1 468-i (24%) gazdandyrylǵan, dep habarlaıdy Egemen.kz.
Búgingi tańda elimizdiń 18 532 myń halyq sanynan 9 836 myń adam tabıǵı gazǵa qol jetkizdi, sonyń ishinde 4 mln adam – aýyldyq eldi meken turǵyndary.
Gazdandyrý deńgeıi 90%-dan asatyn neǵurlym gazdandyrylǵan óńirler: Atyraý oblysy – 99,6%, Mańǵystaý oblysy – 99%, Almaty qalasy – 98,8%, Batys Qazaqstan oblysy – 96,5%, Shymkent qalasy – 92,1% jáne Aqtóbe oblysy – 90,1%.
Qazirgi ýaqytta respýblıka óńirlerin odan ári gazdandyrý boıynsha jumystar júrgizilýde.
«Qoldanystaǵy jáne perspektıvaly gazdandyrý jobalary boıynsha taldaý júrgize otyryp, aýyldyq eldi mekenderdi gazdandyrýdyń boljamdy jospary jasaldy, oǵan sáıkes 2025 jylǵa qaraı qosymsha shamamen 246 aýyldyq eldi mekendi nemese 900 myń adamdy gazdandyrý kútilýde», dedi N. Noǵaev.
Mınıstrdiń aıtýynsha, onyń ishinde 2021 jyly – 52 aýyldyq eldi meken nemese 389 myń adam, 2022 jyly – 49 aýyldyq eldi meken, 2023 jyly – 76 aýyldyq eldi meken, 2024 jyly – 31 aýyldyq eldi meken jáne 2025 jyly – 43 aýyldyq eldi meken gazdandyrylady.
Gazdandyrýdyń jedel qarqyny jáne qarjylandyrýdyń málimdelgen somalaryn qoldaý Energetıka mınıstrliginiń eldi mekenderdi gazdandyrý Jol kartasynda belgilengen kórsetkishterge josparly túrde qol jetkizýge, ıaǵnı 2025 jylǵa qaraı elimizdiń 1 718 eldi mekenin, sonyń ishinde 1 674 aýyldyq eldi mekendi gazdandyrýǵa múmkindik beredi. Sonyń nátıjesinde 11,05 mln adam, onyń ishinde aýyldyq eldi mekenderde turatyn 4,9 mln adam kógildir otynǵa qol jetkizedi.
«Bul másele mınıstrliktiń turaqty baqylaýynda», dedi N. Noǵaev.