Bokstan Polshanyń Kels qalasynda ótip jatqan jastar arasyndaǵy álem birinshiliginiń jartylaı fınaldyq saıystary aıaqtaldy, dep habarlaıdy Egemen.kz.
Biz buǵan deıin qyzdarymyzdyń ekeýi fınalǵa shyǵyp, úsheýi aqtyq synǵa joldama alǵany jaıynda jazǵan edik.
Keshki baǵdarlamada uldar kúsh synasty. Alǵashqy bolyp rıngke asa jeńil salmaqtaǵy Sanjar Tashkenbaı kóterildi. Ol úndistandyq Bıshvamıtra Chongtamny jeńdi.
Komandalyq áriptesiniń jeńisti jolyn 56 kılo salmaqtaǵy Erbolat Sabyr jalǵastyrdy. Qandasymyz Eýropa birinshiliginiń jeńimpazy degen ataǵy bar reseılik Alekseı Shendrıkke shań qaptyryp ketti.
60 kılo salmaqtaǵy Elnur Súıinbaı da el senimin aqtady. Ol kolýmbııalyq Djon Orobıony jolynan yǵystyrdy.
64 kılo salmaqta saıysqa túsken Sabyrjan Aqqalyqovtyń aıdarynan jel esti. Jalyndy jas úndistandyq Ankıt Narvaldy esh qınalmaı utty.
75 kılo salmaqtaǵy Dıas Moljigitov pen reseılik Mıhaıl Ýsov arasyndaǵy jekpe-jek óte tartysty ótti. Alǵashqy raýnda Dıas 1:4 esebimen utylǵanymen, kelesi raýnda qarqynyn kúrt kúsheıtti – 5:0. Básekeni sońǵy bóligi de óte qarqyndy ótti. Tóreshiler biraz oılana-tolǵana kele Eýropa birinshiliginde kúmis medaldi ıelengen boksshynyń qolyn kóterdi.
Osylaısha, Qazaqstannyń uldar quramasynyń tórt birdeı múshesi fınaldyq saıysta kúsh synasý qurmetine ıe boldy.