Qazaqstanda kúnbaǵys maıy qymbattady. Keıbir óńirde baǵa lıtrine 732 teńgege deıin jetken. Sonymen qatar tazartylǵan maı óndirisi bir jylda birden 54,4 paıyzǵa ósti, dep habarlaıdy Egemen.kz Energyprom.kz-ke silteme jasap.
Eldegi bazarlar men dúkenderde kúnbaǵys maıynyń lıtri 637 teńgeden saýdalanýda. Bul osydan bir aı burynǵyǵa qaraǵanda 1,9 paıyzǵa jáne bir jyl burynǵyǵa qaraǵanda 44,3 paıyzǵa qymbat.
2021 jyldyń birinshi toqsanynda elde 50,9 myń tonna tazartylmaǵan kúnbaǵys maıy óndirildi. Bul bir jyl burynǵyǵa qaraǵanda 14,9 paıyzǵa kóp. Tazartylǵan maı óndirisi bir jylda birden 54,4 paıyzǵa, 45,2 myń tonnaǵa deıin ósken.
Elimizde tazartylmaǵan kúnbaǵys maıyn shyǵarý negizinen Shyǵys Qazaqstan, Qostanaı jáne Aqtóbe oblystaryna tıesili. Tazartylǵan maıdy óndirý boıynsha Shymkent, sondaı-aq Shyǵys Qazaqstan oblysy men Almaty kósh bastaıdy.
Aıta keteıik, qazaqstandyq bes iri kúnbaǵys maıyn óndirýshiniń monopolııaǵa qarsy zańnamany buzǵany anyqtaldy. Bul týraly básekelestikti qorǵaý jáne damytý agenttigi málimdedi. Osy jyldyń alǵashqy eki aıynda kúnbaǵys maıy 6,7 paıyzǵa qymbattaǵan.