SQO-da esirtki óndiretin shaǵyn laboratorııanyń qylmysy áshkerelendi, dep habarlaıdy Egemen.kz.
Aqpan aıynyń basynda esirtkini jasyryn orynǵa salmaq bolǵan kúdiktilerdiń biri ustaldy. Polıseıler tintý kezinde on bes zıplokpen túıinshekti tárkilegen. Saraptama nátıjesinde eń qaýipti sıntetıkalyq «mefedron» tabyldy.
Kúdiktiniń aıtýynsha, ol bul jumysty telegram jelisi arqyly tapqan. Kóp uzamaı polısııa osy jeliniń uıymdastyrýshysyn qolǵa túsirdi. Birinshi ustalǵan jigit taýardy osy kisiden alǵan. «Satýshynyń» jaldamaly páterinen tártip saqshylary esirtki óndiretin shaǵyn zerthana men daıyn ónimdi, ıaǵnı 160 gramm «sıntetıkany» tapty.
– Atalǵan faktige qatysty QR Qylmystyq kodeksiniń 297-babynyń 3-bóligi boıynsha qylmystyq is qozǵaldy. Ustalǵandar Petropavl qalasy Polısııa basqarmasynyń ýaqytsha ustaý ızolıatoryna qamaldy, – dedi SQO PD Esirtki qylmysyna qarsy is-qımyl basqarmasynyń bastyǵy Jandos Basybaev.