Altaı Kólginov Instagram paraqshasynda bıyl elordada bir mln-nan astam jasyl jelek otyrǵyzý josparlanǵanyn málim etti, dep habarlaıdy Egemen.kz elorda ákimdiginiń resmı saıtyna silteme jasap.
«Maqsatymyz - elordany ekologııalyq turǵyda qala turǵyndary úshin jasyl ári jaıly etý! Bıyl 1 mln-nan astam jasyl jelek (aǵashtar, butalar, kóshetter jáne t. b.) otyrǵyzýdy josparlap otyrmyz. Elordanyń jasyl beldeýi de, barlyq aýdandary da qamtylmaq. Tek saıabaq aýmaǵynda otyrǵyzyp qana qoımaı, sonymen qatar aýlalarda, eldi mekenderde jáne kógaldandyrý jetkiliksiz jerlerde otyrǵyzamyz.
Búgin «Birge – taza Qazaqstan» ekologııalyq aılyǵyna Qoshqarbaev kóshesinde (Qordaı men Tólebaev kósheleriniń arasynda) aǵashtar otyrǵyzyldy. Sonymen qatar Sh.Aıtmatov kóshesinde aǵash otyrǵyzýǵa qatystyq. Sharaǵa jastar, eriktiler, «Bolashaq» qaýymdastyǵynyń músheleri, qala turǵyndary qatysty. Sondaı-aq qalada kún saıyn elordany sanıtarlyq tazalaý jáne abattandyrý jumystary júrgizilip jatyr.
Kórikti jerlerimizdiń aýmaǵynda jasyl araldar paıda bolady. «Astana Opera» mańyndaǵy aýmaqta emen baǵy, Trıatlon saıabaǵynda mamyrgúl baǵy, «Astana Balet» aýmaǵynda da ózindik jasyl baq bolady. Sondaı-aq pedagogtardyń, dárigerler men qutqarýshylardyń qurmetine skverler ashyp, olardy abattandyramyz.
Osylaısha, ýaqyt óte kele búkil qala boıynsha jasyl araldar paıda bolady. Jyldan-jylǵa ekologııalyq aımaqtar sany artpaq. Biraq jasyl keńistikterge tıisti kútim qajet. О́tken jyly aǵashtardy kesý kezinde ótemdik otyrǵyzý eki esege artty. Eger buryn «beske bir» bolsa, qazir «onǵa bir».
Qalany jappaı kógaldandyrý ekologııany jaqsartýǵa jáne qala turǵyndarynyń ýaqytyn ótkizýge arnalǵan oryndardy qurýǵa ǵana emes, sonymen qatar qalanyń klımattyq jaǵdaıyn jumsartýǵa múmkindik beredi.
Memleket basshysy halyqqa Joldaýynda eldi aýqymdy kógaldandyrýdyń mańyzdylyǵyn atap ótti», dep jazdy elorda ákimi.