Reseıdiń Sankt-Peterbýrg qalasynda bir aptaǵa jalǵasqan bokstan «Gýbernator kýbogy» jolyndaǵy jarys máresine jetti.
Atalǵan týrnırde baq synaǵan Qazaqstan quramasynyń bylǵary qolǵap sheberleri eki altyn, eki kúmis jáne úsh qola medal jeńip aldy.
El qorjynyna alǵashqy altyndy Olımpııa oıyndarynda «qazaqtyń salmaǵy» atanyp ketken 69 kıloǵa deıingi salmaq dárejesinde judyryqtasqan Aslanbek Shymbergenov saldy. Irikteý kezeńderinde qarsylastaryn aıqyn jeńgen jerlesimiz jartylaı fınalda 2018 jyly Djakartada ótken Azııa oıyndarynyń fınalynda ese jibergen ózbekstandyq boksshy Bobo-Ýsmon Batýrovpen kezdesti. Ese qaıtarýdy úsh jyl kútken jerlesimiz jekpe-jekte aıanyp qalǵan joq. Gong úni estilgennen bastap birinshi nómirmen judyryqtasqan Shymbergenov qarsylasyn burysh-buryshqa tyqsyryp, óziniń soqqylaryn dittegen jerine dóp tıgizip jatty. Shabýylda da, qorǵanysta da saýatty óner kórsetken Aslanbek tóreshilerdiń biraýyz sheshimimen jeńiske jetip, ózbek boksshysynan Azııa oıyndarynda ketken esesin qaıtardy.
Fınaldyq saıysta Aslanbekti áıgili reseılik boksshy Andreı Zamkovoı kútip turǵan edi. 2012 jylǵy London Olımpıadasynyń jartylaı fınalynda otandasymyz Serik Sápıevten jeńilgen Zamkovoı qazaqstandyq jankúıerlerge jaqsy tanys. 2018 jyldan bastap karerasyn qaıta jalǵastyrǵan ol sol jyly Reseı birinshiliginde top jarsa, araǵa jyl salyp óz elinde ótken álem chempıonatynda jasyndaı jarqyldady. Bıyl 34 jasqa tolatyn reseılik boksshy álem birinshiliginiń jartylaı fınalynda elimizdiń birinshi nómirli boksshysy Abylaıhan Júsipovti 5:0 esebimen qapy qaldyrǵan edi. «Gýbernator kýbogyna» naǵyz babynda kelgen Aslanbek Shymbergenov fınalda Reseı boksshysyn óz elindegi jarysta tóreshilerdiń biraýyz sheshimimen jeńip, týrnır jeńimpazy atandy.
El qorjynyna ekinshi altyndy 81 kıloǵa deıingi salmaq dárejesinde sharshy alańǵa shyqqan Bekzat Nurdáýletov saldy. 2019 jyly Reseıdegi álem chempıonatynda altyn medal oljalaǵan otandasymyz bul joly da Reseı tórindegi jarysta qarsylas shaq keltirmedi. Qazaqstan chempıony jartylaı fınalda álem birinshiliginiń fınalynda kezdesken ózbekstandyq Dılshodbek Rýzmetovti jeńse, fınalda sharshy alań ıesi – Imam Hataevty nokdaýnǵa túsirip, qarsylasyn óz jankúıerleri aldynda kúmánsiz jeńdi. Degenmen reseılik boksshymen ótken jekpe-jektiń birinshi raýndynda otandasymyzdyń ózi de kútpegen jerde soqqy ótkizip alyp, nokdaýnǵa túsip qalǵan-tyn. Biraq qalǵan eki raýndta Nurdáýletov tóreshilerdiń bura tartýyna jol bermedi.
О́kinishke qaraı, 52 kılo salmaqta baq synaǵan byltyrǵy Qazaqstan chempıony, 2019 jylǵy jastar arasyndaǵy álem chempıonatynyń qola júldegeri, jas ári daryndy boksshymyz Mahmud Sabyrhan fınaldyq saıysta Rıo Olımpıadasynyń chempıony ózbekstandyq Shohobıddın Zoırovpen judyryqtasty. Teń dárejede ótken jekpe-jekte tóreshiler jeńisti ózbek boksshysyna berdi. Fınalda jeńilgen Mahmud Sabyrhan jarystyń kúmis júldesine ıe boldy. Sondaı-aq 75 kılodaǵy otandasymyz Ábilhan Amanqul densaýlyǵyna baılanysty sheshýshi jekpe-jekke shyqqan joq. Nátıjesinde, bul salmaqta jeńis avtomatty túrde reseılik Gleb Bakshıge berildi. Sonymen qatar bul jarysta qazaqstandyq boksshylar úsh qola júldeni jeńip aldy. Atap aıtqanda, Danııal Sábıt (49 kg), Beknur Ojanov (60 kg) jáne Aıbek Oralbaı (91 kg) qolany qanaǵat tutty.
Osylaısha, bokstan Qazaqstan erler quramasy «Gýbernator kýbogynda» eki altyn, eki kúmis jáne úsh qola júldemen jalpykomandalyq esepte úshinshi oryn aldy. Birinshi oryn 18 medal (4 altyn, 6 kúmis, 8 qola) jeńip alǵan Reseı boksshylaryna buıyrsa, ekinshi orynǵa 4 altyn, 1 kúmis jáne 1 qola medal ıelengen О́zbekstan quramasy jaıǵasty.