Jastarymyz julqynyp tur

Bes jigitimiz

jeńis tuǵyryna kóterildi

Pol­shada bes jigitimizge jeńis tuǵy­ryna kó­terilý baqyty buıyrmady. Tu­saýkeser kezdesýinde Nurjan Aman­keldi (69 kılo) reseılik Sheraf Asha­laevtan aılasyn asyra almady. Ký­balyq Braıan Leon Salgado Erasyl Jaqypbekovti (81 kılo) san soq­tyryp ketse, Kenje Muratuly (52 kılo) men Amanat Sabyrǵalı (+91 kılo) ekinshi kezeńde súrindi. Ekeýi de О́zbekstannyń ókilderine ese jiberdi. Shırek fınalda Mádı Altynbaevtyń (91 kılo) asyǵy alshysynan túspedi. Qandasymyz úndistandyq Vıshal Gýptaǵa jol berdi.

Shırek fınalda 56 kılo salmaqta saıysqa túsken Erbolat Sabyr men 64 kılo salmaqta kúsh synasqan Sa­byrjan Aqqa­lyqovtyń óneri kóp­shilikti súı­sindirdi. Ekeýi de Kýba boksshylaryna qarsy jekpe-jekte óte saýatty taktıka us­tanyp, kúmánsiz jeńiske jetti. Erbolat Sabyr Ivan Rodrıges Hortadan áldeqaıda alymdy kórinse, Sabyrjan Darıan Haver Kastrony qapy qaldyrdy. 75 kılo sal­maqtaǵy Dıas Moljigitovtiń lıtvalyq Aleksandr Trofımchýkten mereıi ústem boldy. 49 salmaqtaǵy Sanjar Tashkenbaı ózbekstandyq Ibragım Isjonovtan aılasyn asyrsa, 60 kılo salmaqtaǵy Elnur Súıinbaı brazılııalyq Iýrı Dos Reıesten basym tústi. Osylaısha, bes jigitimiz jartylaı fınaldyq mejege jetti.

Jartylaı fınalda asa jeńil salmaqtaǵy Sanjar Tashkenbaı al­ǵash­qy bolyp rıngke kóterildi. Ol úndistandyq Bıshvamıtra Chongtamny jeńdi. Komandalyq áriptesiniń jeńisti jolyn Erbolat Sabyr jalǵastyrdy. Qandasymyz Eýropa birinshiliginiń jeńim­pazy, reseılik Alekseı Shendrıkke shań qaptyryp ketti. Elnur Súıinbaı da el senimin aqtady. Ol kolýmbııalyq Djon Orobıony jolynan yǵystyrdy. Sabyr­jan Aqqalyqovtyń da aıdarynan jel esti. Jalyndy jas úndistandyq Ankıt Narvaldy esh qınalmaı utty. Al Dıas Moljigitov pen reseılik Mı­haıl Ýsov arasyndaǵy jekpe-jek óte tartysty ótti. Alǵashqy raýndta Dıas 1:4 esebimen utyl­ǵanymen, kelesi raýn­da qarqynyn kúrt kúsheıtti – 5:0. Básekeniń sońǵy bóliginde Dıas alymdy kóringen edi. Biraq ádil­dikti belden basqan tóreshiler Eýropa birinshiliginde kúmis medaldy ıelengen Reseı boksshysynyń qolyn kóterdi.

Jarystyń sońǵy kúni aqtyq aı­qastardy tamashaladyq. Sanjar Tash­kenbaı reseılik Robert Badalıanmen kezdesti. Bizdiń jigit barlyq jaǵynan basym boldy. Eýropa chempıony qansha jantalasqanymen, Tashkenbaı oǵan adym ashtyrmaı, únemi orap otyrdy. Oń qolmen de, sol qolmen de siltegen soqqylary nysanaǵa dóp tıip jatty. Nátı­jesinde, barlyq tóreshiler Sanjardyń myqtylyǵyn moıyndady.

Kóp keshikpeı Erbolat Sabyr rıngke kóterildi. Ol Sachınmen saıysqa tústi. Jasyratyny joq, qandasymyzǵa qaraǵanda Úndistannyń ókili alymdy kórindi. О́ziniń jyldam ári jınaqy qımylynyń arqasynda Sachın álem chempıony atandy. Erbolat kúmis me­daldy qanaǵat tutty. Sol sekildi Elnur Súıinbaı da ekinshi orynda qalyp qoı­dy. Japonııalyq Reıko Sýsýmıge qarsy jekpe-jekte ol boıy men qolynyń uzyndyǵyn utymdy paıdalana almady. Qarsylasy óziniń saýatty taktıkasy men jankeshtiliginiń arqasynda jeńiske jetti.

Al 64 kılo salmaqta kúsh synasqan Sabyrjan Aqqalyqovtyń mereıi ústem boldy. Ýkraınalyq Bozorboı Matıakýbovpen aıqasty basynan aıaǵyna deıin bir demmen ótkizgen qazaq boksshysy qarsylasyn ábden tómpeshtedi. Nátıjesinde, tóreshilerdiń barlyǵy da Aqqalyqovty jeńiske laıyq dep tapty. Sóıtip Sabyrjan da álem chempıony atandy.

Osylaısha, Qazaqstannyń jas­tar q­u­ramasy Polshadaǵy jarysty 2 altyn, 2 kúmis jáne 1 qola medalmen qo­rytyn­dylady. Osy nátıjemen jalpy­komandalyq esepte ekinshi oryndy ıelendik. Aldymyzda – Reseı boksshylary. Olar 2 altyn, 3 kúmis jáne 2 qolany oljalady. Úshinshi orynda – О́zbekstan quramasy. Olar 2 altyn men 2 qolany qorjynǵa saldy. Sondaı-aq Ýkraına (1 altyn+2 kúmis+2 qola), Úndistan (1+0+3), Japonııa (1+0+0), Kýba (1+0+2), Polsha(0+1+0), Armenııa (0+1+0) jáne Chernogorııanyń (0+1+0) byl­ǵary qolǵap sheberleri úzdik ondyqtyń qataryna qosyldy. Barlyǵy bul jarysta 17 memlekettiń órenderine jeńis tuǵyryna kóterilý baqyty buıyrdy.

Osyǵan deıin uıymdastyrylǵan jastardyń álem birinshiliginde Qazaq­stannyń ánurany eki retten artyq shyr­qalǵan emes. Eń eleýli tabysqa biz osydan jeti jyl buryn qol jetkizgen edik. 2014 jyly Sofııada ótken baıraqty báse­kede Shalqar Aıqynbaı men Abylaıhan Júsipov bas júldeni oljalap, barsha qazaq jankúıerlerin qýantty. Sol jarys­ta Sultan Záýirbek pen Vadım Kazakov aqtyq synǵa deıin alqynbaı jetkenimen, sheshýshi tusta utylyp, kúmis medaldy moıyndaryna ildi.

Burymdylarymyz

bes júlde aldy

Qyzdar arasyndaǵy jarysta da barlyq 10 salmaq dárejesi boıynsha baq synadyq. О́kinishke qaraı, Araılym Marat (48 kılo), Gúlnar Turapbaı (51 kılo), Aıshagúl Eleý­baeva (54 kılo), Nazerke Serik (57 kılo) jáne Mılana Aıýpova (64 kılo) jarysty merziminen buryn aıaqtady. Al qalǵandary jartylaı fınalǵa deıin jetip, júldeli oryndar úshin talasý múmkindigine ıe bol­dy. Bul mejede 60 kılo salmaqtaǵy Jul­dyz Shaıahmetova ózbekstandyq Dıl­fýza Bekovadan basym tússe, 75 kılo salmaqtaǵy Dana Dıdaı sol eldiń taǵy bir ókili So­hıba Rýzmetovadan aılasyn asyrdy. Osy kezdesýlerdiń ekeýinde de bizdiń qyzdardyń ústemdigi esh kúmán týǵyz­ǵan joq. Al Jas­mın Qızatova (69 kılo) polshalyq Barbara Marchınkovskaǵa, Ásel Saǵatova (81 kılo) reseılik Ksenııa Olıfırenkoǵa jáne Eldana Tálipova (+91 kılo) moldovalyq Darıa Kozorezge jol berip, qola medaldy qanaǵat tutty.

Fınalda qazaqtyń qos qyzy Úndis­tannyń ókilderimen qolǵap túıistirdi. Baıraqty básekege úndilerdiń keremet daıar­lyqpen kelgeni birden baı­qaldy. Ún­di eliniń jeti qyzy shırek fınalǵa deıin jetip, olardyń bar­lyǵy da óz qar­sylastarynan basym boldy. Jartylaı fınalda da álgi jeteý­diń joly boldy. Aqtyq saıysta da úndis­tandyqtar mereıi ústem boldy. Sheshýshi tusta Juldyz Shaıah­metova Vınkaǵa, al Dana Dıdaı Sanama Chaný Tokchomǵa qarsy shyqty. О́kinishke qaraı, Juldyz qarsylasynyń qarqyndy shabýylyna tótep bere almady. Nátıjesinde, Vınka altyn alsa, Shaıahmetova kúmis medaldy qanaǵat tutty. Kóp keshikpeı rıngke Dana kóterildi. Bul báseke shıeleniske toly boldy. Eki jaq ta aıanyp qalǵan joq. Desek te tóreshiler jeńiske Tokchomdy laıyq dep tapty.

Jalpykomandalyq esepte Úndistan quramasy aldyna jan salmady. Olar jeti altyndy oljalap, tórtkúl dúnıe jan­kúıer­lerin tamsandyrdy. Ekinshi oryndaǵy Reseıdiń qorjynynda 1 altyn, 2 kúmis jáne 1 qola medal bar. 1 altyn, 1 kúmis jáne 4 qolany enshilegen О́zbekstannyń ókilderi úshinshi satyǵa jaıǵasty. Tórtinshi jáne besinshi oryndarda – Túrkııa (1+0+0) men Polsha (0+2+5). Al Qazaqstan quramasy altynshy satyǵa taban tiredi. Polshadaǵy jarysty bizdiń qyzdar 2 kúmis jáne 3 qola medalmen qorytyndylady.