Jumyrtqa óndirý tómendedi

Byltyrǵy kórsetkishten bı­ylǵ­­y sáıkes merzimdegi qus sany 22,6 paıyzǵa azaıǵan. Sonyń ke­sirinen jumyrtqa óndirý 69 paıyzǵa deıin tómendegen. Tipti Qyzyljar aýdanyndaǵy qus sany 46,8 paıyzǵa deıin kemipti. Bul jumyrtqa óndirýge ǵana emes, qus etin óndirýge de teris áserin tıgizip otyr. Sonyń ishin­de Qyzyljar aýdanynda 19,1 paıyzǵa tómendese, Petropavl qalasynda et ónimderin shyǵarý 42,3 paıyzǵa deıin quldyraǵan.

Oblys ákimi Qumar Aqsaqalov qus tumaýynan byltyr 1 mln-ǵa jýyq qus qyrylǵanyn aıtty. Memleket 813 mln teńge ótemaqy tólegen. Búgingi tańda qus fabrıkalary 1 mln bas qus ákelgen, taǵy da 760 myń bas áke­lýge kelisimshart jasaǵan. Bul qustar mamyr aıynda jetki­zilmek.

Osy arqyly keıbir qus fabrıkalary ónim kólemin burynǵy deńgeıge jetkizdi. Máselen, «Iаkor» qus fabrıkasy qazir 14 mln danaǵa deıin jumyrtqa shy­ǵarady. Bul burynǵy kór­setkishke qaraılas. Biraq osy Qyzyljar aýdanyndaǵy «Beskól qus fabrıkasy» daǵdarystan áli de aryla almaı, ónim kólemin dittegen mejege jetkize almaı otyrǵan kórinedi. Buryn únemi aldan kórinetin ozyq kásiporynnyń bir soqqydan ońalmaı qalǵany ma? Byltyr bul kásiporyn qus tumaýynan qatty zardap shek­ti. Fabrıka basshysynyń aıtýyna qaraǵanda, 180 myń ta­ýyq qyryldy. Oblystaǵy aýyl­sharýashylyq kásiporyndar arasynda únemi aldyńǵy qatarda jú­retin beskóldikterge bul ońal­mas soqqy boldy. Onyń ústine, ótemaqyny da tolyq ala almaǵan.

Sóıtsek, gáp basqada. Ob­lys ákiminiń birinshi orynbasary Marat Tasmaǵambetov bes­kóldikter 25 myń qus satyp al­ǵanyn aıtty. Sondaı-aq al­daǵy shilde aıyna deıin taǵy 100 myń taýyq jetkizbek eken. Eń bastysy, bul kásiporyn endi ózindegi úırekti tegis etke satyp, jumyrtqa óndirýge aýysyp jatqan kórinedi. Bul úshin burynǵy ǵımaratyn da qaıta jaraqtap, endi tek ta­ýyq ósirýge yńǵaılapty. Qazir ká­siporyn 30 myń úırekti satýǵa ázir­lep otyr. Sonyń esebinen Ger­ma­nııadan taýyq satyp almaq. Kásip­oryn mamandary qazir nemis tehnologııasyn meńgerý qamymen Germanııada júr.

Soltústik Qazaqstan oblysy