Irak astanasy Baǵdatta COVID-19 vırýsyn juqtyrǵan naýqastardy emdeý úshin salynǵan aýrýhanada órt shyqty. Tilsiz jaý ondaǵan adamnyń ómirin qıdy.
Ibn Hatıb aýrýhanasyndaǵy órt ottegi ballondarynyń jarylýynan týyndady deıdi. Pandemııa kezinde vırýs juqtyrǵandardy emdeýmen aınalysqan medısınalyq ortalyqtaǵy apat kezinde keminde 27 adam qaıtys bolyp, 46 kisi jaralanǵan degen aqparat bar.
Ortalyq qyzmetkerleri jalynnyń tez tarap ketkenin, ony toqtatý múmkin bolmaǵanyn jetkizdi. Onyń ústine ǵımaratta órt sóndirý qurylǵylary qarastyrylmaǵan.
Iraktyń Azamattardy qorǵaý agenttiginiń basshysy Kadım Boham aýrýhanadaǵy 120 naýqastyń 90-y qutqarylǵanyn málimdedi. General-maıordyń aıtýynsha, órt tolyqtaı sóndirilgen.
Eldiń onsyz da ondaǵan jyl boıy túrli sanksııa, soǵys pen sátsiz kelissózderden japa shegip, kenjelep qalǵan medısına salasy taǵy birneshe jylǵa artqa ysyrylǵandaı soqqy aldy. Oǵan qosa koronavırýs pandemııasy da Iraktyń medısınasy qanshalyqty aqsap turǵanyn kórsetip úlgergen edi.
Jalpy, Irakta vırýsqa qatysty jaǵdaı ońalmady. О́tken aptada COVID-19 juqtyrǵandar sany 102 528 bolsa, odan kóz jumǵandar 15 217-ge taıady.
Aýrýhanalarda ottegi ballondary jetispeıdi. О́zdiginen dem alýy qıyn naýqastardyń tósekterine sılındrler ákelingen. Alaıda ol sılındrler uzaqqa barmaıdy. Medısına qyzmetkerleri men naýqastyń týystaryna ony únemi aýystyryp otyrý kerek eken. Azamattardy qorǵaý agenttigi órtte qazaq tapqandar osy sılındrsiz dem ala almaıtyndar ekenin jetkizdi. Olardyń aıtýynsha, qurylǵy alyp júrý úshin de aýyr bolyp shyqqan.