Tokıo Olımpıadasynda óner kórsetýdi maqsat tutqan balýandar eń sońǵy synaqtan ótpek. Naqtylap aıtsaq, 6-9 mamyr aralyǵynda kúres túrlerinen Bolgarııanyń bas shahary – Sofııada lısenzııalyq týrnırdiń jalaýy jelbireıdi, dep habarlaıdy Egemen.kz
Taıaý kúnderi Tokıo
Sol jerde áli de joldamaǵa qol jetkize almaǵan sańlaqtar ózara kúsh synasyp, ǵalamdyq dodaǵa barýǵa kimder laıyq ekenderin anyqtaıdy. Jeńiske jetkenderi Japonııaǵa barsa, jeńilgenderi jer sıpap qalady.
Bıyl Tokıoda alaýy tutanatyn Olımpııa oıyndarynyń alǵashqy joldamalary 2019 jyly Nur-Sultanda ótken álem chempıonatynda sarapqa salynǵany belgili. Odan keıin ár qurlyqta irikteý týrnırleriniń shymyldyǵy túrildi. Atap aıtsaq, Amerıkanyń apaıtósteri koronavırýs derti beleń almaı turyp, byltyrǵy jyldyń kókteminde Kanadanyń astanasy – Ottavada lısenzııalyq jarysty uıymdastyryp úlgerdi. Bıyl naýryz aıynyń ekinshi jartysynda Eýropanyń órenderi Majarstannyń bas shahary – Býdapeshte bas qosty. Sáýir aıynyń basynda Afrıkanyń saıypqyrandary Týnıste kúsh synasty. Al odan keıin Azııanyń arlandary Almatyda aıqasty. Álemdik dodada 108 joldama óz ıesin tapsa, qurlyqtyq básekelerdiń árqaısynda 36 lısenzııadan taratyldy.Qazirgi kezde AQSh quramasy kúrestiń úsh túri boıynsha eń kóp joldamany oljalap otyr. Amerıkanyń 15 balýany Tokıoǵa baratyndardyń tiziminde. Ekinshi orynda – Reseı. Olardyń 13 sportshysy dál sondaı qurmetke bólendi. Úshinshi satydaǵy Kýbanyń 12 qabylany tórtjyldyqtyń basty dodasynda baq synaıdy. Qazaqstan, Qytaı jáne Irannyń da jaǵdaıy jaman emes. Sary qurlyqta ornalasqan osy úsh memlekettiń árqaısynan 11 balýan Kún shyǵys eline attanady. Japonııa men Týnıstiń – 10, Aljır, Belarýs, Mysyr, Túrkııa, Qyrǵyzstan, О́zbekstannyń – 8, Grýzııa, Germanııa, Ýkraına, Mońǵolııanyń – 7, Úndistannyń – 6, Ázirbaıjan, Majarstan, Nıgerııanyń – 5, Armenııa, Bolgarııa, Kanada, Polsha, Shvesııanyń – 4, Brazılııa, Kolýmbııa, Serbııanyń – 3, Estonııa, Ulybrıtanııa, Ońtústik Koreıa, Meksıka jáne Soltústik Koreıanyń – 2 sańlaǵynyń asyǵy alshysynan tústi. Taǵy 24 memleket ókilderinde bir-bir joldamadan bar.О́zderińiz baıqaǵandaı eń kóp joldamany ıelengen komandalar arasynda Qazaqstan úzdikter sanatynda. Iаǵnı biz ozyq alty memlekettiń qataryndamyz. Árıne, bul – óte jaqsy kórsetkish. Biraq kóńilge kirbiń túsiretin jaıttar da joq emes. Máselen, grek-rım kúresinen qorjynymyzda ázirge bar-joǵy úsh joldama ǵana bar. Ol lısenzııalardy Meırambek Aınaǵulov (60 kılo), Ashat Dilmuhamedov (77 kılo) jáne Nursultan Tursynov (87 kılo) ıelendi. Bul jaǵdaı sport salasynyń tizginin ustaǵan azmattarǵa oı salýǵa tıis. О́ıtkeni, kúrestiń bul túrinde bizdiń eldiń jeńispen órilgen tamasha dástúri bar. Olımpııa oıyndary men álem chempıonatynda jeńis tuǵyryna kóterilgen Anatolıı Kolesov, Vladımır Bakýlın, Valerıı Rezansev, Anatolıı Nazarenko, Anatolıı Bykov, Jaqsylyq Úshkempirov, Shámil Serikov, Dáýlet Turlyhanov, Iýrıı Melnıchenko, Baqtııar Baıseıitov, Mkhıtar Manýkıan jáne taǵy basqa kóptegen dańqty jerlesterimizdiń sporttyq arenalardaǵy erligin kózi qaraqty kórermender kúni búginge deıin aýyzdarynan sýlary quryp áńgimeleýde. Mine, osyndaı dástúri bar memlekettiń ǵalamdyq dodada úsh-aq balýany beldeskeni yńǵaısyz jaǵdaı. Sol olqylyqtyń orny Sofııada tolady dep úmittenemiz.
Áıelder kúresin serik etken burymdyldarymyz da úsh joldamany qanaǵat tutyp otyr. Ony Valentına Islamova (50 kılo), Tatıana Ahmetov (53 kılo) jáne Elmıra Syzdyqova (76 kılo) ıelendi. Bul jaǵdaı da kóńilimizge selkeý túsiredi. Kúrestiń bul túri de Qazaqstanda qazir jaqsy qarqynmen damyp keledi. 2016 jyly Rıo-de-Janeıroda alaýy tutanǵan Olımpıadada bizdiń qyzdardyń úsh júlde alýy joǵaryda aıtylǵan sózimizdiń aıqyn dáleli. Onyń aldyndaǵy Beıjiń men Londondaǵy dodalardan da qur qol qaıtqan joq edik. Bolgarııada arýlarymyz baryn salyp, qorjynymyzdy keminde eki lısenzııamen tolyqtyrady dep úmittenemiz.Erkin kúres sheberleriniń aıaqalysy óte jaqsy. 2019 jyly Nur-Sultanda olar tórt joldama alsa, bıyl Almatyda taǵy bir lısenzııaǵa qol jetkizdi. Onyń ıegerleri – Nurıslam Sanaev (57 kılo), Dáýlet Nııazbekov (65 kılo), Danııar Qaısanov (74 kılo), Álisher Erǵalı (97 kılo) jáne Iýsýp Batyrmurzaev (125 kılo). Tek qana 86 kılo salmaqta beldesetin jigitterimiz kózdegen maqsatyna qol jetkize almaı júr. Eger Bolgarııada bir balýanymyzdyń baǵy jansa, onda Tokıoda tolyq qurammen óner kórsetemiz. Sol joldama úshin kimniń aıqasatynyn aldaǵy kúnderi ulttyq quramanyń bas bapkeri Áset Serikbaev jarııalaıtyn bolady.