Elimizde 26 sáýirden bastap resmı túrde otandyq QazCovid-in (QazVac) vaksınasyn halyqqa egý bastaldy. Osylaısha, Qazaqstan álemde Sovid-19 indetine qarsy óz vaksınasyn ázirlep, óndiriske shyǵarǵan saýsaqpen sanarlyq elderdiń sanatyna qosyldy.
Keshe Densaýlyq saqtaý mınıstri Alekseı Soı Nur-Sultan qalasyndaǵy №9 emhanada alǵashqylardyń biri bolyp QazVac vaksınasyn saldyrdy. Ol qazaqstandyq vaksınanyń alǵashqy partııasy Bıologııalyq qaýipsizdik problemalary ǵylymı-zertteý ınstıtýty bazasynda 50 myń doza kóleminde óndirilgenin jáne óńirler boıynsha taratylyp jatqanyn habarlady.
«Biz álemde vaksına óndirisin iske qosqan on eldiń jáne vaksınany shyǵarýdyń tolyq sıklin – ázirleýden bastap qoldanýǵa deıin ıgergen bes eldiń qataryna kiremiz. Bul – úlken jetistik. Qaraǵandylyq farmasevtıka zaýyty vaksınalardyń negizgi partııalaryn qosymsha óndiredi, naryqty toltyrady, bul azamattardyń zamanaýı preparattarǵa qol jetkizýine múmkindik beredi», dedi A.Soı.
Memleket basshysynyń tapsyrmasyna sáıkes QazCovid-in vaksınasyn Bilim jáne ǵylym mınıstrligi Ǵylym komıtetiniń Bıologııalyq qaýipsizdik problemalary ǵylymı-zertteý ınstıtýty ázirlegen. Qaz-Covid-In – óli vırýstan jasalǵan vaksına. Bul bulshyqet ishine 0,5 ml/dozasy engiziledi. Quramynda SARS-CoV-2 tazartylǵan ınaktıvırlengen tutas vırıondy shtamy bar. QazCovid-in «Qazaqstan, kovıd, ınaktıvasııalanǵan» degendi bildiredi. Bul hımııalyq reagentpen «óltirilgen» 2019-Ncov vırýsyna negizdelip jasalǵan. Vaksınadan keıingi asqynýlar jeńil ótedi ári dene qyzýy joǵarylamaıdy. Sondaı-aq Spýtnık V vaksınasy sııaqty eki komponentti jáne 21 kúndik ıntervalmen salynady. Otandyq vaksınanyń bir artyqshylyǵy – saqtaý sharttary. Eger Spýtnık V vaksınasy tońazytqyshta 18 gradýs temperatýrada saqtalsa, QazVac vaksınasy 2-8 gradýs temperatýrada saqtalady. Bul preparatty óndirýshiden tutynýshylarǵa jetkizý logıstıkasyn jeńildetedi.
Klınıkalyq zertteýlerdiń birinshi kezeńine 18-65 jas aralyǵyndaǵy 44 erikti, ekinshi kezeńge 200 adam, úshinshi kezeńge 3 myń adam qatysty. Qazaqstan dúnıejúzilik densaýlyq saqtaý uıymynyń reestrine óziniń kovıdke qarsy vaksınasyn tirkedi.
QazVac vaksınasyn klınıkalyq zertteýdiń I-II fazasynyń nátıjeleri boıynsha esepter jáne III fazasynyń aralyq esebi onyń qaýipsizdigin rastaıdy. Usynylǵan esepter negizinde, Úkimettiń 2020 jylǵy 15 jeltoqsandaǵy № 850 qaýlysymen bekitilgen COVID-19-ǵa qarsy vaksınalardy ýaqytsha memlekettik tirkeý qaǵıdalaryna sáıkes vaksına medısınalyq qoldanýǵa jiberiledi. QazVac ýaqytsha tirkeý kýáligi 2020 jyldyń 31 jeltoqsanynda berilgen. Qazaqstandyq vaksınany synaýdyń úshinshi kezeńi Hattamada kózdelgen zertteý sýbektileriniń 50% belgisinen ótti jáne ony osy jyldyń 25 maýsymynda aıaqtaý josparlanyp otyr. Osydan keıin QAZVAC tıimdiligin tolyq baǵalaý júrgiziledi.
Vaksınalardyń klınıkalyq zertteýleri, sonyń ishinde III fazada, búkil álemde jalǵasýda. Sonymen Reseı Spýtnık V zertteýlerin 2021 jyldyń mamyr aıynyń basynda aıaqtaýdy josparlap otyr, al álemdegi kóptegen farmasevtıkalyq kompanııa óz zertteýlerin 2022-2023 jyldary aıaqtaıdy.
Qalyptasqan epıdemııalyq jaǵdaıǵa baılanysty koronavırýs ınfeksııasyna qarsy vaksınalardy medısınalyq qoldanýǵa jedel jiberý týraly sheshimder álemniń kóptegen retteýshi organdarynda qabyldanady. Bul rette vaksınalardy qoldanýǵa ruqsat etýdiń qysqa merzimine qaramastan, olardyń sapasy men qaýipsizdigin tekserý muqııat jáne barlyq talapty saqtaı otyryp júrgiziledi.
Búginde QazVac vaksınasynyń 50 myń dozasy óńirlerge taratyldy: 6 myń dozadan Nur-Sultan men Almaty, 4 myń dozadan Shymkent, Qaraǵandy, Shyǵys Qazaqstan jáne Almaty oblystary, 2 myń dozadan qalǵan óńirler aldy. Mamyr aıynda taǵy 50 myń doza shyǵarylady dep kútilýde. Bolashaqta preparat óndirisi kezeń-kezeńmen aıyna 500 myń dozaǵa deıin artady.