Qyzylorda tarıhı-ólketaný mýzeıiniń Aqmeshit fılıaly qolǵa alǵan «Kıeli mura» jobasy sheńberinde taǵy bir qundy jádiger el ıgiligine aınalǵaly tur. Oblystyq mýzeı men «Qyzylorda» telearnasy birlesip júrgizgen zertteý barysynda Syr boıyndaǵy belgili batyrlardyń biri – Buqarbaı Estekbaıulynyń qylyshy men móri, shashaqty týy týraly habar efırge ázirlendi.
Buqarbaı Estekbaıuly 1812 jyly Jalaǵash óńirinde dúnıege kelgen. El úshin at arqasynan túspegen batyr qazaqtyń sońǵy hany Kenesarynyń qasyna ergen serikteriniń biri retinde de belgili. Jurtyn jaýǵa talatpaǵan Buqarbaı keıinnen eldi aryq qazdyrýǵa jumyldyryp, aınalasyndaǵy aǵaıyndy eginshilikke baýlyǵan.
Batyrdyń erlikteri sol kezeńdi sýretteıtin jyrlarda, tarıhshy Ermuqan Bekmahanovtyń zertteýlerinde, jazýshy Ilııas Esenberlınniń «Qahar» romanynda baıandalady.
– El ishinde burynǵy batyr-bılerden qalǵan jádigerler áli de kóp. Bizdiń mindet – osy qundylyqtar jaıly derek jınap, ony kóptiń ıgiligine aınaldyrý. Alda batyrdyń qylyshy, týy men móriniń kóshirmesin jasatyp, mýzeıge qoıýdy josparlap otyrmyz, – deıdi oblystyq tarıhı-ólketaný mýzeıi Aqmeshit fılıalynyń meńgerýshisi Kenje Ahmetova.
Bul dúnıeler batyr atyn ıelengen aýyldaǵy Jalaǵash aýdandyq tarıhı-ólketaný mýzeıiniń fılıaly sanalatyn tarıhı úıde saqtalyp tur. Qylyshqa saraptama jasaǵan mamandar bylǵary qynda saqtalǵandyqtan, qarý búginge baıaǵy qalpynda jetip otyrǵanyn aıtady.
Tarıhı úıge batyrdyń qylyshyn, naızasyna ilingen shashaqty týy men kúmisten jasalǵan mórin urpaqtary tapsyrypty.
QYZYLORDA