Birinshi orta salmaqta judyryqtasatyn qazaqstandyq boksshy Batyr Júkembaev kásipqoı bokstaǵy kezekti jekpe-jegin 29 mamyrda AQSh-ta ótkizetin boldy. Bul týraly boksshynyń ózi málimdedi.
Birden aıta keteıik, bul kóp – jekpe-jektiń biri emes. Júkembaev kásipqoı rıngte 2015 jyldan beri kúsh synasyp júr. Sol kezden beri 18 ret sharshy alańǵa shyǵyp, barlyq básekede mereıi ústem bolǵan. 14 qarsylasyn nokaýtpen utty. Buǵan deıin tek Kanadada judyryqtasqan otandasymyz endi alǵash ret AQSh sharshy alańynda óner kórsetpek.
Qandasymyz sońǵy kezdesýin byltyr 25 qańtarda Kanadada ótkizip, meksıkalyq Rıkardo Larany ekinshi raýndta tehnıkalyq nokaýtpen jeńdi. Qazirgi kezde Batyr – WBA Continental jáne IBF Inter-Continental belbeýleriniń ıegeri. Aldaǵy aıqasta otandasymyz Pýerto-Rıko ókili Sabrıel Matıaspen judyryqtasady. Bul jekpe-jekte jeńiske jetken boksshy IBF nusqasynyń chempıondyq ataǵynan úmitker atanady. Boks keshi AQSh-tyń Los-Andjeles qalasynda ótedi dep josparlanǵan.
Batyr Júkembaevtyń qarsylasyna toqtalar bolsaq, 29 jastaǵy Sabrıel Matıastyń kásipqoılar arasynda judyryqtasyp júrgenine alty jylǵa jýyqtady. Sol aralyqta 17 kezdesý ótkizip, onyń 16-synda qarsylastaryn merziminen buryn jeńgen. Tek bir jekpe-jeginde ǵana jeńilistiń kermek dámin tatýǵa májbúr bolǵan.