Qazaqstandyq tennısshi Grıgorıı Lomakın Mysyr astanasy – Kaırde ótken ITF Men M15 Cairo týrnıriniń juptyq synynda bas júldeni jeńip aldy.
Qazaqstan tennıs federasııasynyń málimeti boıynsha, 23 jastaǵy temirtaýlyq sportshy júlde qory 15 myń AQSh dollaryn quraǵan dodaǵa Qazaqstan quramasynan jalǵyz ózi qatysqan. Jarysta 25 jastaǵy germanııalyq sportshy Kaı Vehneltpen jup qurap óner kórsetken jerlesimiz barlyq kezdesýin jeńispen aıaqtaǵan. Qazaqstandyq-germanııalyq jup fınalda argentınalyq Hýan Ignasıo Gaparsý men Hýan Pablo Pastan eki sette 6:4, 6:2 esebimen basym túsip, halyqaralyq jarysta top jaryp otyr.
G.Lomakın men K.Vehnelt irikteý kezeńinde ıtalııalyq Danıelı Kapechchı men Franchesko Passarony úsh sette 3:6, 6:3, 10:5 esebimen jeńip jarys jolynan yǵystyrsa, shırek fınalda japonııalyq sportshylar Shoheı Chıkamı men Rımpeı Kavakamıdi eki sette 6:2, 7:6 jáne jartylaı fınalda amerıkalyq Olıver Kroýford pen germanııalyq Benedıkti úsh sette 3:6, 6:3, 10:8 nátıjesimen tize búktirdi.