Qazirgi kezde Jambyl oblysynda joldar jiti tekserilýde. Búgin óńirlik kommýnıkasııalar qyzmetiniń alańynda oblystyq Polısııa departamenti ákimshilik polısııa basqarmasynyń bastyǵy Mámbet Smaılov brıfıng berip, aımaq avtojoldaryn tekserý barysynda 2117 aqaýlyq anyqtalǵanyn jetkizdi.
Byltyr bul kórsetkish 2842 bolǵan. Aqaýlardy atap aıtar bolsaq, respýblıkalyq mańyzy bar avtojoldarda 59 kemshilik, oblystyq mańyzy bar joldarda 81, aýdandyq avtojoldarda 367 jáne de eldi mekenderdiń kóshe-jol jelilerinde 1610 kemshilik anyqtalypty.
«Jyl bastalǵaly úsh aıda jol qozǵalysy qaýipsizdigi maqsatynda oblys avtojoldaryna 493 tekseris júrgizildi. Sonyń ishinde tekserispen qamtylǵany 3088 shaqyrym. Tekseris qorytyndysy boıynsha jol uıymdarynyń basshylaryna oryndaý úshin 493 jazbasha ókim berilgen. Olar boıynsha 386 jaýap alynyp, 85 ókim boıynsha merzimderiniń uzartylýyna jáne qarajattyń bolmaýy týraly jaýap, 107 ókim boıynsha belgilengen oryndaý merzimderi bar. Avtokólik joldaryna qyzmet kórsetýdegi kemshilikter boıynsha aýdandyq jáne oblystyq atqarý organdaryna 104 aqparat joldandy, onyń ishinde 52 aqparat jergilikti organdarǵa joldandy», dedi, Mámbet Smaılov.
Sonymen qatar avtokólik joldaryna qanaǵattanarlyqsyz qyzmet kórsetkeni jáne jol qozǵalysy qaýipsizdigin qamtamasyz etpegeni úshin oblys boıynsha 46 laýazymdy tulǵa ákimshilik jaýapkershilikke tartylǵan.
Jambylda jol ınfraqurylymyn jaqsartý jáne aımaq aýmaǵyndaǵy avtojoldarmen qaýipsiz ótý mańyzdy. Bul rette halyqaralyq mańyzy bar «Almaty-Nur-Sultan-Reseı Federasııasynyń shekarasy» 209 shaqyrym jáne respýblıkalyq mańyzy bar «Merki-Shý-Býrybaıtal» 266 shaqyrym avtokólik joldaryn qaıta jańartý jumystary júzege asyrylýda. Sondaı-aq 2019-2020 jyldary iske asyrylǵan «Jol kartasy» jol-kólik oqıǵalary sanynyń tómendeýine oń áserin tıgizgen. Iаǵnı, ótken jyly jalpy jol-kólik oqıǵalarynyń sany 23 paıyzǵa tómendep, 1223-ten 942-ni kórsetken.