Shet aýdanyndaǵy arheologııalyq-etnografııalyq mýzeıde saqtaýly turǵan qalaq dombyranyń qyzǵylyqty tarıhy bar. Qaraǵaıdan shaýyp jasalǵan bul aspap áıgili kúıshi Ábiken Hasenovke tıesili eken.
Mýzeı dırektorynyń mindetin ýaqytsha atqarýshy Dınara Ahanovanyń aıtýynsha, bul dombyrany atalǵan mekemege 2007 jyly Tursyn Muqanuly esimdi kisi tapsyrypty.
Dáýlesker kúıshi Ábiken Hasenov bul azamattyń О́spen aýylynda turǵan ákesi Muqan Maqajanovpen zamanynda qatty aralasyp, syılasqan eken. Sol dostyqtyń belgisi retinde bir kelgeninde óziniń dombyrasyn syıǵa tartyp ketipti.
Bul týrasynda Tursyn Muqanuly aıtqan estelikti Shet mýzeıiniń dırektory bolǵan marqum Zárýbaı Súıindikov bylaı dep hatqa túsirgen: «1942 jyly Ábiken Hasenuly bizdiń úıge kelgen edi. Ol – bizdiń jaqta óte tanymal dombyrashy. Ábiken aýylǵa keldi degendi estigen jurt bizdiń úıge jınalatyn. Kedeı otbasy bolsaq ta, bizdiń úıge ǵana túsýshi edi. Bir kelgende eki-úsh kún qonyp ketetin. Halyq ony jibermeıtin. Meniń esimde qalǵany – ol uzyn boıly, qaratory kisi bolatyn. Kózi úlken, qyr muryndy, shashy qara, artqa qaıyrylǵan, keń mańdaıly, symbatty adam edi. Jas shamasy 40-45 jasta bolatyn. Meniń ákemniń de anda-sanda dombyra shertip qoıatyny bar edi. Sol kelgende Ábiken óziniń qolyndaǵy dombyrasyn ákem Muqanǵa syıǵa tartyp ketti. Sol dombyrany ákemniń kóziniń qarashyǵyndaı saqtap osy kúnge jetkizdim. Balalarymnyń jasy kishi kezinde syndyrasyńdar dep ustatpaıtynmyn».
Qaraǵandy oblysy,
Shet aýdany